«Республика къарындаш халкъгъа не жаны бла да болушлукъ этерге хазырды»

Къабарты-Малкъар Республиканы Башчысы Казбек Коков Донецкде официал жолоучулугъуну чегинде Донецк Халкъ Республиканы Башчысы Денис Пушилин бла тюбешгенди. Аны юсюнден Казбек Коков кесини телеграм-каналында айтханды.

«Донбассны халкъы бла Къабарты-Малкъарда жашагъанланы эрттегили огъурлу байламлыкълары барды, бир ахшы тарыхлары да. Бизни аталарыбыз бла аппаларыбыз, бир бирлерине билек болуп, Ата журтубуз эм жарыкъ келлик заманыбыз ючюн къанларын-жанларын аямагъандыла. Кёз туурабызда бола тургъан ишле кезиулю кере бизни Президентибиз Владимир Владимирович Путин къыралыбызны, Донбассны халкъын къоруулар, Украинада денацификацияны бла демилитаризацияны бардырыр ючюн этген оноуну тюзлюгюн кёргюзтеди. Аны созуу мамыр адамланы арасында андан да уллу къоранчлагъа, Россейге бютюн эсленирча заранлагъа келтирирге боллукъ эди», – дегенди КъМР-ни Башчысы.

«Сёзсюз, бюгюннгю болумлада биз Донбассны къарындаш халкъыны къыйынлыкъларындан бир жанына турлукъ тюйюлбюз. Донецкде аны Башчысы Денис Пушилин бла тюбешгенме. Мындан арысында да тири байламлыкъланы сюзгенбиз.  Сёз эм алгъа гуманитар болушлукъну юсюнден баргъанды, аны кезиулю колоннасы 100 тонна ёлчемде болушлукъ бла Нальчикден Донбассха ашырылгъанды.

Дагъыда Денис Владимировичге 20 тонна жюкге документлени бергенме, анга дарманла, медицина керекле, элекроэнергияны автоном халлы тапдыргъан керекле, аш-азыкъ эм биринчи изленнген керекле киредиле. Андан сора да, ДНР-ни излемлерине деп, терк медицина болушлукъ тапдыргъан жангы автомобиль беребиз. Мындан арысында да саулукъ сакълауда, социал эм инженер инфраструктураны жангыдан ишлеуде, эл мюлкде эм башха бёлюмледе себепликни ёсдюрюр муратлыбыз», – деп айтылынады публикацияда.

Казбек Коков Къабарты-Малкъарны медицина бирлешмесини башламчылыгъыны юсюнден да айтханды: «ДНР-де бла ЛНР-де болумладан Къабарты-Малкъарны медицина ишчилери да бир жанында къалмагъандыла. Стоматология эм бет-жаякъ хирургиябызны врачлары, керек болса, ачыгъанлагъа болушлукъ тапдырыргъа хазырдыла, ол санда республикадан тышында да. Ала топ-окъ тийген саусузланы багъыуда сынамлары болгъан бийик даражалы специалистледиле».

«Бизни регионда сабийлени солуу жаны бла соруулагъа энчи къаралгъанды. Бусагъатда Нальчикде «Радуга» сабий-реабилитация арада Макеевкадан 35 жашчыкъ бла къызчыкъ турадыла, алагъа медицина эм социал-психолог болушлукъ тапдырылады. Кёп болмай тюбешгенибизде, сабийле ёз Макеевкаларына эм энчи Денис Владимировичге салам айтдыргъандыла. Ол огъурлу жумушну сюйюп тамамлагъанма. Сабийлени биринчи къаууму кетгенлеринден сора, экинчи къауумну сакълайбыз. Сабий саулукъ кючлеу солууну андан ары айнытырыкъбыз. Бизни специалистлерибизни Донбассдан сабийлеге жарарыкъ уллу сынамлары барды», – деп хапарлагъанды Башчы, жолоучулугъуну юсюнден айта.

Дагъыда билдириуде айтылгъаннга кёре, урлукъ салыу ишни, агропромышленный бёлюмню саулай ишини соруулары да сюзюлгендиле. Керек болса, Къабарты-Малкъар урлукъла эм семиртгичле бла болушурукъду.

«Донбассны халкъ республикалары бла битеу огъарыда сагъынылгъан ызлада байламлыкъла тутарыкъбыз эм, сёзсюз, къарындаш халкъгъа гуманитар болушлукъ жибергенлей турлукъбуз», – деп чертгенди Казбек Коков.

Кесини жанындан Денис Пушилин телеграм-каналында былай жазгъанды: «Республикагъа Къабарты-Малкъардан делегация келгенди, анга таматалыкъны Башчысы Казбек Коков этеди. Республикабызгъа билеклик аслам бёлюмледе эсленеди. Андан аскерчиле эркинлик ючюн энчи операциягъа къошулупдула. Къабарты-Малкъарда сабийлерибиз солуйдула. Республика Донбассха дарманла, терк медицина болушлукъ тапдыргъан машинала бла болушургъа хазырды, социал магъаналы объектлени жангыртыудан, къурулуш материалла эм тийишли техника жалчытыудан да артха турмайды. Байламлыкъланы кючлерикбиз!»