Эл мюлкде уруннганлагъа болушлукъгъа танг себеплик

Быйылгъы жылны аллындан бери Россельхозбанкны Къабарты-Малкъар Республикада бёлюмю регионну  эл мюлкде уруннганларына 114 миллион сомну ёнкючге бергенди. Аладан 30 миллионун, башхача айтханда, 26 процентин  агропромышленность комплексде ишлегенле льгота халда алгъандыла, деп билдиреди финанс учрежденияны республикада пресс-службасы.

Ёнкюч ахчала  асламысында тёреде болуучусуча, жаз башы сабан ишлени бардырыргъа бёлюннгендиле, аланы ёлчеми битеу да эл мюлкде уруннган энчи предпринимательлеге берилген ырысхыны 81 процентин тутады.

 «Бюгюнлюкде эл мюлкде уруннганлагъа тыш къыралладан келтирилген ашарыкъланы орунуна, аллай продуктланы кеси жерибизде чыгъарыугъа уллу жууаплылыкъ салынады. Белгилерчады,  агропромышленность  комплексде уруннган ата журтлу биригиулерибиз къыралны аш азыкъ бла жалчытыугъа тийишли юлюш къошханларын. Ол жууаплы ишде Россельхозбанк ёнкючлени кезиуюнде бёледи  эм консультацияланы тийишлисича этеди», - дегенди финанс учрежденияны  Къабарты-Малкъарда бёлюмюню таматасы Алим Сокуров.

КъМР-ни Эл мюлк министерствосу билдиргеннге кёре, озгъан жылда тахта кёгетледен, ол санда жемишледен алгъан бай тирлик 429 процентни тутханды. Республикада ёсдюрюлген жемишле, алгъын тыш къыралладан сатып алып тургъан Россейни кёп регионларына ашырыладыла. Саулай да Къабарты-Малкъар  башха субъектлеге аллай продукцияны 400 минг тоннадан аслам жиберирге хазырды.

2021 жылда республиканы терек бахчаларында уруннганла 535,5 минг тонна тирилик жыйгъандыла. Белгилерчады, Къабарты-Малкъар жемишле  ёсген кёп жыллыкъ тёрекчиклени салыуу бла Россейде иги кёрюмдюлери болгъан беш регионну санына киргенин.

Къабарты-Малкъар мындан арысында да жемишледен тирлик берген кёп жыллыкъ тереклени орнатыуун бардырлыкъды, аны бла бирге жыйылгъан тирликни сакъларгъа уллу комплексле да ишлерикди. Битеу ол затла тыш къыралладан келтирилип тургъан жемишлени эм башха кёгетлени алышындырыугъа  себеплик берликдиле.                     

Бюгюнлюкде Россельхозбанк эл мюлкде уруннганлагъа льгота халда ёнкючлени берген баш финанс учреждениягъа саналады. Андан сора ол филиаллары бла къыралда алчыланы санында турады.  Къабарты-Малкъарда банкны 14 бёлюмю жетишимли ишлейди, дегенди А. Сокуров.

Бизни корр.