ЖКХ-ны айнытыуну эмда къоркъулу юйледен кёчюрюуню программасын толтурууну амалланын сюзгендиле

 Казбек Коков «Жер-жерлени айнытыуну фонду» жамауат-праволу компанияны  попечитель советини таматасы Сергей Степашин эмда ол компанияны баш директору Константин Цицин бла тюбешгенди. Ала экиси да республикагъа иш бла келгендиле.

КъМР-ни Башчысы  Сергея Степашинни бла Константин Цициннни Фондха жангы статус берилгени бла алгъышлагъанды эмда аланы бери келгенлерини хайырындан жашау журтла-коммунал комплексни айнытыуну эмда оюлургъа къоркъуулу юйледе жашагъанланы тынгылы журтлагъа кёчюрюуню программасын толтурууну амалларын сюзерге онг чыкъгъаны ючюн жюрек ыразылыгъын билдиргенди.

 Фондну келечилери эски юйледен кёчюрюуню 2023 жылгъа жарашдырылгъан программасы болжалдан алгъа толтурулгъанын бек ыразы болуп белгилегендиле. Аны хайырындан  62 эски юйден 1020 адам кёчюрюлгенди.

 -Къабарты-Малкъар программаны биринчи кесегин толусунлай тамамлагъанды. Аны 1,5-2 жылдан бошаргъа белгиленнген  эди да, андан иги да алгъа толтуралгъансыз. Ол а кыйматлы ишигизни юлгюсюдю. Къабарты-Малкъар Республика эски юйледен кёчюрюуню программасын толтуруу бла он алчы регионну санына киреди. Аны эсге алып, аллай жангы программагъа ахча бла себеплик этерге таукелбиз, - дегенди Сергей Степашин.

 Россейни Президенти Владимира Путинни буйрукъларына кёре,  регионда 2021 жылны 1 январына дери эсепге тюшген къоркъуулу юйлени санын азайтыу жаны бла жангы программа жарашдырылгъанды. Къабарты-Малкъарда 15,6 минг квадрат метрни тутхан 19 кёп фатарлы юйледен 1 819 адамны кёчюрюрге белгиленеди. Тюбешиуде айтылгъаныча, программаны  2024 жылны ахырында, болжалдан алгъа, толтурургъа мурат этиледи.

 Сергей Степашин  «къыйын экономика болумгъа, санкциялагъа, бизни къыралгъа къажау къозгъалыулагъа да къарамай, Президентибизде арсарлыкъ эсленмеййди» деп ышандыргъанды. «Кёп болмай ол Правительство бла кенгеш бардырып, къурулушну, эски юйлени эмда тынгылы ремонтну юсюнден сёлешгенди. Оюла тургъан юйледен кёчюрюуню программасы андан ары толлтурула барлыкъды, ахча  барды, ишибизни тохтатырыкъ тюйюлбюз», - дегенди ол.

Мындан ары тамамланыллыкъ ишлени планы уа Фондну келечилери бла бирге бардырылгъан кенгешде сюзюлгенди. Бу иш Россейни Правительствосу алгъаракълада къабыл кёрген бегимге кёре бардырыллыкъды. Анга тийишлиликде регионла шёндюден окъуна федерал бюджетде 2023 эмда 2024 жыллагъа деп белгиленнген ахчаны эски юйлени азайтыу мадарларында хайырланыргъа боллукъдула. Ол а программаны теркирек толтурургъа себеплик этмей къоярыкъ тюйюлдю.

 Тюбешиуде сёз коммунал инфраструктураны жангыртыуну программасыны юсюнден да баргъанды. Бек алгъа быргъыланы, ол санда суу ызланы, алышындырыргъа кереклиси чертилгенди.

 Кенгешден сора Казбек Коков кесини телеграм-каналында былай жазгъанды: «Бу ишни тынгылы тамамлауну къыйматлы амалларын излейбиз, ол санда тюрлю-тюрлю программалагъа бла миллет проектлеге къатышыу бла».

 Къабарты-Малкъарда «Таза суу» федерал проектге кёре юч жылны ичинде суу бла жалчытыучу 50-ден артыкъ объект ишленнгенди. Жууукъ эки жылда муниципалитетлеге ичер суу бла жалчытхан объектлени жангыртыргъа бла ишлерге 130 миллион сом бёлюнюрюкдю. Бахсанда битеу узунлугъу 77 километрни тутхан суу ызны  жаланда Россейни Правительствосу берген бюджет кредитни хайырындан тартып башларгъа онг чыкъгъанды.Ол уллу проектни багъасы эки миллиард сомдан артыкъды. Аны къурулушун 2023 жылны декабрь айында бошаргъа белгиленеди.

 Нальчикни жангы жашау журтла ишленнген тийрелеринде жашау журтланы къурулушларын бардырыргъа кёллендириуню 2022-2024 жыллагъа жарашдырылгъан программасына кёре суу эмда канализация ызла тартыргъа белгиленеди. Шогенцуков эмда Къулийланы Къайсын атлы проспектледе жолланы тапландырыуну чекелеринде инженер коммуникацияла да жангыртылгъандыла. Бюгюнлюкде республика ЖКХ-ны системасын жангыртып башларгъа хазырланады. Кенгешде аны бла байламлы ишлени тюрлюлери эмда региондан заявкала бериуню болжаллары да белгиленнгендиле.