Къабарты-Малкъарда уллу комплекс ишлерикдиле

КъМР-ни Башчысы Казбек Коков Москвада «Эко-культура» агропромышленость холдингни президенти Александр Рудаков бла ишчи тюбешиу бардыргъанды.

Тюбешиуню кезиуюнде Къабарты-Малкъар Республиканы жеринде Шимал Кавказда эм уллу теплица комплексни ишлеу бла байламлы соруула сюзюлгендиле, деп билдиргендиле республиканы оноучусуну пресс-службасындан.

 «Запад бизни къыралгъа санкцияланы тохтаусуз салып тургъанына  эм башха тыйгъычлагъа да къарамай, сагъынылгъан теплица комплексни къурулушу тийишлисича бардырылады, ол проект белгиленнген мардалагъа кёре хайырланыргъа берилликди.  Анда ёсдюрюлген продукцияны Россейни кёп  регионларына эм тыш къыраллагъа жиберирге мурат барды. Къабарты-Малкъарда эл мюлк продукцияны, жемишлени тюрлю-тюрлюлерин аслам халда чыгъарыргъа битеу онгла бардыла», - дегенди Казбек Коков кесини телеграм-каналында.

 Уллу теплица комплексде сау жылны ичинде томатла бла жемишле ёсдюрюлюп турлукъдула. Проектни толусунлай тамамларгъа битеу да 18,4 миллиард сом къоратыллыкъды. Теплица эки кезиуге ишленирикди. Биринчини багъасы 7,6 миллиард сомду, ары 40 гектарда сау жылны ичинде тирлик берип тургъан теплицала киредиле эм алада 648 адам урунурукъду.

Теплица комплексни экинчи кезиую 62.5 гектарны аллыкъды эм  къурулуш ишле 2024 жылны ахырына дери бардырыллыкъдыла.  Битеу да эл мюлк предприятияда эки мингнге жууукъ ишчи жер къураллыкъды. 

Бу уллу проектни инвестору  «Эко-культура» деген агропромышленный комплексди, ол  тирликни башы жабылгъан топуракъда  ёсдюрген  Россейде эм уллу биригиуледен бириди. Ол холдингни баш муратларындан бири-чыгъаргъан продукциясыны тазалыгъыды,   тирлик шёндюгюлю биология амалланы хайырлана ёсдюрюледи. Инвестор мындан арысында производство кючлерин кенгертирге мурат этеди. КъМР-ни Башчысы Казбек Коковну буюруууна кёре, регионну жанындан биригиуге инфраструктура эм администрация болушлукъ тапдырыллыкъды.

 Озгъан жыл республиканы оноучусу Чегем районда ишленирик жангы теплица комплексни къурулушуна биринчи ташны салыу бла байламлы къууанчлы ишге къатышханды.  Бюгюнлюкге къурулуш бардырыллыкъ жерни планын этип бошай турадыла, андан сора комплексни къыстау ишлеп башларыкъдыла.  Жылны ахырына дери биринчи терекчикле   орнатыллыкъдыла. 

«Къабарты-Малкъаргъа инвестицияланы келиулерини уллу магъанасы барды. Быллай уллу проектни тамамлау регионну экономикасын айнытыугъа себеплик берликди», - деп чертгенди Казбек Коков кесини билдириуюнде.