Социал объектлени къурулушуна - аслам эс

Кёп  болмай КъМР-ни Къурулуш эмда жашау журт -коммунал мюлк министерствосунда Правительствону Председателини  биринчи орунбасары  Муаед Кунижевни  башчылыгъында  кенгеш болгъанды. Анга республиканы Къурулуш эмда жашау журт-коммунал мюлк министри  Алим Бербеков, Спорт министерствону башчысы Ислам Хасанов, орунбасарлары,  районланы администрацияларыны башчылары эм башхала къатышхандыла. Аны юсюнден бизге ведомствону пресс-службасындан билдиргендиле.

Тюбешиуде баш тема быйыл республикада  уллу социал магъаналы объектлени къурулушларын бардырыугъа жораланнганды. Аны чеклеринде  Нальчикде жангы спорт комплекс, Аушигерде  амбулатория ишленириги,  Дыгулыбгейде  поликлиникагъа тынгылы ремонт этиллиги эм бир къауум садик бла  школ да жангыртыллыгъы сагъынылгъанды.    
Жыйылыуда  жамауат аслам хайырланнган онеки жер  игилендириллиги да айтылгъанды.   Ала, конкурс бардырылып, къол кётюрюу амал  бла айрылгъандыла. Бир къауум объектде ишле башланырча келишим этилгенди.  
Нальчик шахар округну  администрациясында билдиргенлерича, Къабарты-Малкъарны 100-жыллыгъына аталгъан скверни да проекти хазырды. Ол Ленин  атлы проспектде  Абхазия бла Сабий чыгъармачылыкъ юйню арасында  орналлыкъды. 

Кенгешде  Нальчикде, республиканы шахарларында,  район аралада эм  федерал  жоллада  да  къурулушлары жылла бла  баргъан мекямланы жарсыуу да кётюрюлгенди. Ол санда  къурулуш организацияланы келечилерине ол жаны бла соруула берирге онг табылгъанды.