Бир бирлерин кеслерини сынамларына тюшюндюргендиле

Бу кюнледе КъМКъУ-ну «Точка кипения» платформасында Шимал Осетиядан Шимал-Кавказ тау-металлургия  институтну (къырал технологиялы университет) келечилери бла тюбешиу озгъанды. Аны кезиуюнде вузлагъа окъургъа  студентлени алыу кампанияны къалай къураргъа эмда  бардырыргъа тийишлисини юсюнден сынам бла шагъырейлениу иш да бардырылгъанды.

Бюгюнлюкде СКГМИ (ГТУ) - да беш минг чакълы жаш адам билим алады. Окъутуу он факультетде жыйырма бир ызда бардырылады. Вуз гуманитар эмда инженер-техника жаны бла бийик билимли специалистлени хазырлайды.

Къонакъбай университетде, тюбешиуню кезиуюнде, асламысында  окъуу юйге кирирге сюйгенлени документлерин алыуну техника жаны бла къуралыууна эс бурулгъанды. Абитуриентле къагъытларын очный халда эмда дистанциялы форматда къалай берликлерини эмда аланы тизмелерин къалай жарашдырыргъа тийишлиси да сюзюлгенди.

-Бюгюннгю болумлада, техника жаны бла усталыкълагъа кирир ючюн физика, математика, химия предметледен ЕГЭ-ле берирге борчлу заманда, жашланы бла къызланы бу ызгъа сейирлерин къозгъагъан да тынч болмайды. Бирси университетлени сынамларын кёрюу, алагъа юйрениу да ахшы амалладан бириди,-дегенди, тюбешиуде сёлеше, СКГМИ (ГТУ)-ни окъуу иш эмда  билим бериуню качествосу жаны бла проректору Галина Станкевич.

Къабарты-Малкъар къырал университетде школчуладан документлени алыу не халда къуралгъаныны юсюнден ректорну кенгешчиси, вузгъа дери хазырлыкъ эмда  профориентация иш жаны бла управленияны таматасы Аксана Карашева хапарлагъанды. Ол билдиргеннге кёре, комиссия ишлеп башлагъан биринчи кюнден окъуна, абитуриентле, ата-анала да кеслери окъуу юйге келип, къайры кирирге сюйгенлери бла байламлы профориентация жаны бла консультация алыргъа, кёп затха тюшюнюрге боллукъдула.

Консультантла къайсы факультетге не экзаменни берирге кереклисин эмда вузну кесини ичинде къаллай сынаула боллукъларын толусунлай ангылатырыкъдыла.  Ызы бла техника жаны бла секретарьла, заявленияны къураргъа болушуп,  хар керек затны билдириулени системасына кийиредиле.

Комиссия «BidBlueButton» дегенча сервислени хайырланады. Ол кёлден бериллик экзаменлени форматыды. Дагъыда «Moode» программа уа сынауланы компьютерде тест халда бардырыугъа себеплик этеди. Андан сора да, хар жаш адамгъа комиссияны сайтында «энчи кабинет» ачылады, «Суперсервис «Вузгъа окъургъа онлайн амал бла кириу» деген платформаны хайыры бла уа документлени къырал услугаланы болушлугъу бла берирге жарарыкъды.

Окъуу юйге кирир ючюн сынауланы дистанциялы халда алыргъа оноу этилсе уа, университет иги кесек замандан бери «Экзамус» программаны хайырланып келеди. Ол а онлайн системады эмда окъуугъа кирирге сюйген адамны ким болгъанын излеп тохташдырады. Аны себеплиги бла университетни кесини ичинде берилирге тийишли  сынаула бардырыладыла (тестле).

Дагъыда КъМКъУ-да окъургъа излегенлеге бир ахшы программа алгъаракъдан бери да ишлейди. Сёз ючюн, ол неда бу предметден ЕГЭ-де 100 балл алгъан бар эсе, алагъа студент болгъанларындан сора бир кереге 50 минг тёленеди. Сора  биринчи семестрде, алыкъа сессиягъа дери окъуна, уллу стипендия берилгенлей турады.

Андан сора да, бир жолгъа эки бийик билим алыргъа сюйгенле бла  байламлы да программаны кёпле жаратадыла. Аны хайыры бла, жаш адам окъуугъа кире туруп, Бир къырал экзаменлени ючюсюнден бирге 180+балл алгъан эсе, ол экинчи бийик билим ючюн ахчаны жюз угъай, 25 процентин тёлерикди.

Комиссияны ишине университетни 50 келечиси, дагъыда волонтёрларындан жыйырмасы къатышадыла. Ала уа окъуу юйню кеслерин билим алыуда эмда жамауат жашауда ахшы жаны бла ачыкълагъан студентлери бла магистрантларыдыла.  Жаш адамла бу жумуш бла кюреширден алгъа анга тийишлисича хазырланадыла эмда тюшюнедиле.

Комиссия апрельден башлап, октябрьге дери бардырлыкъды кесини ишин. Аны алайлыгъы уа, быйыл школланы тауусурукъладан сора да, келир жылда мектепледен чыгъарыкълагъа да тапды. Ала къайсы  жаны бла да не тюрлю сорууларына да заманында жууапла алыргъа, керекли информацияны да кеч къалмай билирге онг табарыкъдыла.