Адамланы солуулары бийик даражада къуралырча

«Туризм эм къонакъбайлыкъны индустриясы» проектни толтурууну чегинде республикада экскурсоводланы эм гидле-тилманчланы аттестациялау барады. Бу кюнледе Курортла эм туризм министерствода ала кезиулю экзаменни бергендиле.

Квалификация экзамен эки кесекден къуралады. Биринчисинде экскурсоводла законодательствону, жолоучулукъланы бардырыуну жорукъларыны юсюнден, биринчи болушлукъ этиуден, тарыхдан, маданиятдан эм географиядан 30 тест соруугъа жууапла бередиле. Мында жангыз да ала материалны къалай билгенлерине угъай, тюрлю-тюрлю болумлада керекли амалланы къалай хайырланнганларына да къаралады.

Тестлени эсеплерине кёре, экзаменни практика кесегине алты соискательден бешиси жиберилгенди, аны уа тийишлисича жангыз да ючеулен толтургъанды. Алагъа аттестатла, идентификация карточкала эм экскурсоводланы (гидлени) федерал тизмесинден шагъатлыкъ къагъытла берилгендиле. Бу документлеге кёре, ала ишлерин энтта беш жылны бардыраллыкъдыла.

Аттестацияны ётерге сюйгенле кезиулю экзамен къачан боллугъун министерствону сайтында билаллыкъдыла.