«Кюмюш» волонтёрланы арасын къураугъа эркинлик, ахча да алыннганды

«Жюреклери къартаймагъанла» деген программагъа  тийишлиликде   «кюмюш» волонтёрланы регион араларын  къурау жаны бла  битеуроссей конкурс бардырылгъанды. Анга бизни республика да  къатышханды. Бу кюнледе уа бизни волонтёрларыбыз аллай мехкеме ачаргъа эркинлик алгъандыла.     

Быйыл конкурсха   къыралны 66 регионундан 201 волонтёр къауум къатышыргъа сюйгенин билдиргенди. Ол а былтыр бла тенглешдиргенде 37-ге кёпдю. Аладан  он организация сайланнганды,  ол санда Къабарты-Малкъарны биригиую да. Ала хар бири да  200 минг сом грант къоллу боллукъдула. Ол ахча волонтёр къымылдауну айнытыугъа эм  консультациялагъа, методикалы материаллагъа, юйретиу программалагъа къоратыллыкъды.

Волонтёр араланы  ассоциациясыны советини  председатели, Россей Федерацияны Жамауат палатасыны члени Артём Метелев  «Жюреклери къартаймагъанла» деген программа жашауда былтыр бардырылып башланнганын, аны эсеплери  абаданла  жамауат ишге тири къатышыргъа, башхалагъа болушургъа  хазыр болгъанларын кёргюзтгенлерин белгилеп айтханды. «Ол а Россейде волонтёрланы къымылдаулары кюч ала баргъанын,  къуру жаш адамланы угъай, уллу жашау сынаулары болгъанланы да бирикдиргенине шагъатлыкъ этеди. «Кюмюш» волонтёрланы араларын къурау жамауатха  хайырлы эм керекли  ишлени санын кёбейтирге себеплик этеригине  мен толу ийнанама»,- дегенди ол.

Эсгертиу: бюгюнлюкде  15000 «кюмюш» волонтёр  проектлерин жашауда бардырадыла.