КъМР-ни Башчысы Казбек Коковну республиканы халкъына чакъырыу сёзю

Бу кюнледе республикабызда жашагъанла арт кюнледе бола тургъан ишле бла байламлы манга кёп соруула бередиле. Мени ниетими да сорадыла. Аны мен  алгъаракълада да ачыкъ этген эдим, ол тюрленмегенди. Ол мени къаныма ата-бабаларымдан сингнгенди. Ол кесими тарыхымы, къыралымы, халкъымы аллында намысымы тюшюрмеулюкню ниетиди.

Бюгюнлюкде Россей Донецк эмда Луганск халкъ республикаланы къоруулау  жаны бла энчи аскер операция бардырады. Аны мураты – Украинада сауутланы бла нацистлени жокъ этиудю. Ол башха амал болмагъандан этилгенин, Россей Федерацияны, аны хар инсаныны къоркъуусузлугъун жалчытыугъа бурулгъанын барыбыз да ангылайбыз. Мен биринчи кюнден окъуна, Къабарты-Малкъарны эмда саулай къыралны  халкъыны асламысыча, Президентибизни оноуу жанлы болуп келеме, аны тюппе-тюзге санайма.

Тутхан ызымы сылтауун да ангылатайым. Арт заманлада Россейге Бирлешген Штатланы эмда НАТО-ну башха къыралларыны жанларындан келген къоркъуу кючлене баргъан болмаса, шошаймагъанды. Алгъын этилген келишимлеге да къарамай, НАТО арт 20 жылны россейли чеклеге жууукълаша келгенин тохтатмагъанды, Россейге уруш къоркъуу жаланда андан келеди деп, аны сылтаугъа тутуп. Украина уа запад аскерле орналлыкъ дагъыда бир къала болургъа керек эди.

Украинли халкъгъа нацизмни ниетлерин жайыу 2004 жылда Киевде  болгъан къозгъалыуланы кезиуюнде башланнганды. Ол а 2014 жылда властьны алышыныууна келтиргенди. Ол замандагъы ачыулу ишле бизни эсибиздедиле.

Киевни нацист Бандераны бла Шухевични ызларын тутхан башчылары 8 жылны ичинде Донбассны халкъын къырыу бла кюрешгендиле. Аланы муратлары белгилиди – 75 жыл мындан алгъача, ала миллетлери, тиллери, жашау турмушлары башха болгъанланы гунч этерге итиннгендиле. Тиширыуланы бла сабийлени ёлтюргендиле, шахарлагъа кече сайын топла атдырып тургъандыла. Бош алай – андагъыла жашаргъа тийишли тюйюлдюле деп. Ол заманны ичинде мамыр адамладан 3 минг чакълы бири ёлгенди. Жаланда Донецкни бла Луганскны ополчениясыны жигитлигини хайырындан къырылмай къалгъанды мамыр халкъ саулай да. Ол 8 жылны ичинде Донбассда жашагъан 800 минг адам Россейни инсанлары, бизни ата журтлуларыбыз, болгъандыла.

Аны бла да къалмай, Киевдеги башчыла НАТО-ну къыстау болушлугъу бла Украинаны бизни къыралыбызгъа къажау буруп, Россейге терс кёзден къарагъанлагъа кеслерини аман муратларына жетерге болушхандыла. Анда запад европалы къыралланы аскер базаларына мурдор къуралгъан эди.

Аны бла бирге тыш къыраллы энчи службала, артыкъда Украинаныкъыла, бизни къыралыбызны жеринде информация атакала бардырып тургъандыла. Ала, иш этип, адамларыбызны алдагъандыла, арабызгъа сууукълукъ кийирирге, биз тарыхыбызны, адет-тёрелерибизни да унутурча этерге кюрешгендиле.

Россей талай жылны ичинде ол проблемадан мамыр амалла бла къутулургъа кюрешгенди, болсада бизге тюшген къоркъуу кючлене баргъанды. Экономиикабызны, жашау халыбызны бузар, Россейни ючюнчю дунияны къыралы болурча этиу мурат бла кийирилген санкциялагъа къошула баргъанына андан ары тёзер амал жокъ эди. Тёзсенг – ала бютюн кюч ала барлыкъ эдиле.

Нацизмни, НАТО-ну бизни юйюбюзню къатларында аскер кючюн ёсдюре барыуун тохтатыргъа, къыралны бла аны инсанларыны сейирлерин къорууларгъа  заман болгъанды. Быллай болумда Россейге жаланда бир амал къалгъанды – болгъанны оюп, чачып баргъан кючню тохтатыргъа, къыралны, бизни кёп миллетли халкъыбызны къорууларгъа эмда  Донбассда кибик, саулай Украинада да мамырлыкъны бла ырахатлыкъны гаранты болургъа. Аны ючюн шёндюгю Россей къыралны битеу онглары бардыла, ол санда политика таукеллиги, кючлю аскери да.

Бюгюнлюкде бизни сауутланнган кючлерибиз битеу дуниягъа да тактика эмда оператив борчланы бийик профессионал усталыкъда толтура билгенлерин кёргюзтгендиле. Душман сауутларын  атады, артха туракълайды. Биринчи кюнледен окъуна алгъа жетишимли барыу хорламгъа келтирмей къоярыкъ тюйюлдю.

Бизни аскерчилерибиз – къыралыбызны кёп миллетли кючлю халкъыбызны келечилери – шёндю толтура тургъан  борчланы тамамларгъа дунияны кёп аскерлерини къолларындан келлик тюйюлдю. Биз россейли аскерде къуллукъ этген жерлешлерибиз бла ёхтемленебиз. Ала кёп миллетли россейли аскерни тизгинлеринде аскер борчларын бет жарыкълы толтурадыла, жигитликлерин кёргюзтедиле. Жашауларына къоркъуу тюшгенлерине да къарамай, Ата журтубузну хар адамын, сабийлерибизни мамыр келир заманларын къорууларгъа батырлача сюеледиле.

Нурмагомед Гаджимагомедов бу кюнледе этилген аскер батырлыкъны юлгюсюдю. Президентибиз Владимир Владимирович Путинни Указы бла анга  Россейни Жигити деген сыйлы ат аталгъанды. Бизни жерлешлерибиз да – Росгвардияны Къабарты-Малкъар Республикада Управлениясыны къуллукъчусу полицияны майору Ратмир Кудаев, Россей Федерацияны Миллет гвардиясыны аскерчилери прапорщик Этезланы Аныуар, кичи сержант Бачиланы Алим да Кишиликни ордени бла саугъаланнгандыла. Жарсыугъа, ёлгенден сора.

Къабарты-Малкъар Республика Россейни башха инсанлары бла бирге Украинаны демилитаризациялауну бла денацификациялауну жолун дурус кёреди, Россейни Президенти Владимир Путин жанлыды. Республиканы жамауатыны, профессионал биригиулерини, жаш тёлю организацияларыны, власть органларыны келечилерини оюмлары, сёлешиулери да бизни адамларыбыз Россейни ахыр мадарлагъа тюртген сылтауланы ангылагъанларына шагъатлыкъ этедиле. Кертилик бизни блады! Хорлам бизни блады!