Республика борчларын толтургъанда жан берген аскерчилени хурметлейди

Донбассны, ол санда Россей Федерацияны гражданлары болгъан адамланы, къоруулау энчи операцияны кезиуюнде ишчи борчларын толтура жан берген Къабарты-Малкъар Республикадан аскерчилени асырагъандыла.  КъМР-ни Башчысы Казбек Коков бушуулу жумушлагъа къошулгъанды, къыралларыны къоркъуусузлугъун сакълап жоюлгъан аскерчилени жууукъ-ахлуларына къайгъы сёз бергенди.

Республиканы оноучусу Кенжеден полицияны подполковниги Аслан Сафарбиевич Кештовну, Баксанёнок элден полицияны тамата лейтенанты Ренат Русланович Калажоковну, Нальчикден полицияны тамата сержанты Альберт Русланович Геховну юйюрлерине къайгъы сёз бергенди.

Къайгъы сёз берирге эм ёлген аскерчилени хурметлерин кёрюрге республиканы Парламентини эм Правительствосуну, ветеран организацияларыны, аскер бёлюмлени эм право сакълаучу органланы келечилери, жамауат да келгенди.

Бюгюн, 3 мартда, Огъары Акъбашдан полицияны майору Ратмир Хабалович Кудаевну асырарыкъдыла. Тюненеги официал халлы информациягъа кёре, ишчи борчларын толтургъан кезиуде аскерчиле Кёнделенден Бачиланы Къурманны жашы Алим эм Яникойдан Этезланы Хамидни жашы Аныуар  ёлгендиле.

Казбек Коковну алгъын берилген буйругъуна кёре республиканы Правительствосу регион бюджетден хар юйюрге бир миллион сом тёлерикди. Андан сора да, республиканы Башчысыны буйругъу бла Къабарты-Малкъардан барып жаралы болгъан аскерчилеге 300 мингишер сом тёленирикди. Алгъын Россейни Миноборонасы да жоюлгъан аскерчилени юйюрлерине миллион сомдан артыкъ тёлеулени ётдюрлюклерин билдиргенди.