Регионда социал-экономика болумну сюзгендиле

КъМР-ни Башчысы Казбек Коков  РФ-ни Правительствосуну Председателини орунбасары Александр Новакны башчылыгъында СКФО-ну субъектлерини  шёндюгюлю социал-экономика болумларын сюзюу бла байламлы бардырылгъан жыйылыугъа къатышханды.  РФ-ни Президентини СКФО-да толу эркинликли келечиси Юрий Чайка да ол кенгешде болгъанды.

Жыйылыуда тыш къыралла бла сатыу-алыугъа чекле салыннганы бла блайламы субъектлени экономикаларын кючлер онгла сюзюлгендиле.

 СКФО-ну битеу регионларында, ол санда Къабарты-Малкъарда, шёндюгю болумну мониторинг этереге оператив штабла къураллыкъдыла. Регион бюджетлени мониторинги бек магъаналыды, нек дегенде, битеу социал борчланы толтурургъа керекди.  Юрий Чайка чертгеннге кёре, бек алгъа Шимал Кавказны экономикасын тутхучлу этиу бла байламлы биринчи этиллик борчланы белгилерге тийишлиди.  

Бюгюнлюкге санкцияла республиканы экономикасыны алчы бёлюмлерине хазна заран келтирмегендиле, дегенди КъМР-ни Башчысы Казбек Коков, жыйылыуну итогларыны юсюнден айта. Республикада аш-азыкъгъа, адамлагъа биринчи керекли товарлагъа эм къурулуш материаллагъа багъала къошулмасынла деп оператив штабла къуралгъандыла. Андан сора да кезиулю эл мюлк ишлени бардырыу жаны бла оноуланы терк халда этерге оператив  штаб ишин тохтаусуз бардырады.

 Январьны кёрюмдюлерине кёре,  республика  промышленность, эл мюлк, къурулуш бёлюмледе чыгъаргъан товарланы саны ёсгенди. Гитче эм орта предпринимательлик бла кюрешгенле да кёбейгендиле. Шёндю 19 минг  энчи предприниматель ишлерин бардырадыла. Налог тёлеуле да ёсгендиле, битеу да озгъан жыл 1,3 миллиард сом жыйылгъанды. Республикагъа туристлени келиулери эки кереге кёп болгъанды, 2021 жылда аланы саны бир миллиондан атлагъанды. Озгъан жылда республикагъа инвестицияланы келиулери 5,5 процентге ёсгенди эм битеу да 51 миллиард сом болгъанды.

 «Ол шарт асламысында экономикабызны алчы бёлюмлеринде предпринимательлик иш тири бардырылгъаныны себебинденди.  Санкцияла къатылана баргъан кезиуде   артыкъ да агропромышленность комплексге, жумушла тамамлауда эм туризмге хазна хата тюшмейди эм  ала жарашдыргъан товарлагъа, тамамлагъан ишлеге сурам барды. Биз гитче эм орта предпринимательлик иш бла кюрешгенлеге субсидияла берирге мурат этебиз», деп айтылады КъМР-ни Башчысыны социальный сетьде энчи бетинде.

 «Миллет проектлени жашауда бардырабыз. Битеу ишле жарашдырылгъан тизмеге кёре этиледиле. Быйыл социал магъанасы болгъан объектлени къурулушларын жангыртып башларыкъбыз. Жолланы тап халгъа келтириу бла байламлы кёп иш тамамланнганды. Ол планланы толтурургъа битеу кючлерибизни хайырланыргъа керекбиз, санкциялагъа да къарамай», -дегенди Казбек Коков, деп билдиреди республиканы оноучусуну пресс-службасы.

 Бизни корр.