Сёз къыйнлыкъгъа тюшгенлеге болушлукъну къурауну юсюнден баргъанды

КъМР-ни Башчысы Казбек Коков КъМР-ни Правительствосуну къаууму эмда муниципал къуралыуланы администрацияларыны таматалары бла ишчи кенгеш бардыргъанды. Анда сёз Донецк эмда Луганск халкъ республикаладан кёчерге тюшген инсанлагъа болушлукъну къурауну юсюнден баргъанды.

Жыйылыуну башлай, Казбек Коков былай айтханды: «Къыралны Президенти Донецк эмда Луганск халкъ республикаланы къоруулау, тюзюн айтханда уа, Россей Федерацияны къоркъуусузлугъун жалчытыу бла байламлы магъаналы оноула чыгъаргъанды. Фашизм не болгъанын кишиге ангылатыр кереклиси болмаз. Уллу Ата журт урушну юсюнден билмеген жокъду.

Алайды да, Президент этген оноула къыралыбызны, къуру бизни къыралыбызны угъай, башхаланы да келир тёлюлерини къоркъуусузлукъларын жалчытыугъа бурулупдула. Бюгюнлюкде бола тургъан къаугъала битеу дунияны халкъларына къоркъуу келтиргенлерине мен ишексизме. Фашизмни ниети окъуна битеу адам улугъа къоркъуу салады. Аны себепли этилген оноула кереклидиле, тюздюле. Къабарты-Малкъарны жамауаты Россей Федерацияны Президентини оноулары жанлыды».

«Биз барыбыз да болушургъа керекбиз Донецк эмда Луганск халкъ республикалада жашагъанлагъа. Къабарты-Малкъарны бир жанында къалмагъан эмда гуманитар болушлукъ этиу жанлы болгъан адамларына жюрек ыразылыгъымы билдиреме. Къолларындан келгенни аямазгъа айтхан, аны къой, къачхынчыланы юйлеринде, фатарларында орнатыргъа хазыр болгъанлагъа энчи ыспас этеме. Туугъан жерлерин къоюп кетерге тюшген адамланы болжаллы халда орнатыу бла кюрешген жаш волонтёрлагъа да бек ыразы болгъанма. Олду чынтты инсанлыкъ. Къабарты-Малкъарны жамауаты республикагъа кибик, саулай Россей Федерациягъа магъаналы граждан ызны тутады», - деп чертгенди республиканы Башчысы.

«Биз тышындан келгенлеге 800 жер хазырлагъанбыз, гуманитар болушлукъну жыйыу жаны бла оператив штаб къуралгъанды. Бир машинаны жибергенбиз, энди экинчисин жыйышдыра турабыз. Анда сабийлеге артыкъда бек керек болгъан затла бардыла. Бу иш андан ары бардырылады. Къабарты-Малкъарны халкъы къарындаш халкълагъа билеклик этиуден артха бир заманда да турмагъанды. Бу жол да ол ниетни тутарыгъына ишекли тюйюлме», - дегенди Казбек Коков.

Кенгешде сёз эпидемиология болумну юсюнден да баргъанды. Республиканы оноучусу ол къыйын болгъанлай къалгъанын, алай бир халда сакъланнганын эсгертгенди. КъМР-ни саулукъ сакълау министри Рустам Калибатов а коронавирус жукъгъанланы саны азая баргъанын, арт ыйыкъны ичинде ала 38 процентге аз болгъанларын, «терк болушлукъ» да алгъынча терк чакъырылмагъанын билдиргенди.

Жыйылыуда миллет проектле бла къырал программала къалай толтурулгъанларына да къаралгъанды эмда быллай шартла эшитилгендиле: къурулушлары быйыл башланырыкъ 7 школгъа дагъыда 8 билим бериу учрежденияны къошууну юсюнден федерал даражада оноу этилгенди. КъМР-ни Правительствосуну Председатели Мусукланы Алий билдиргеннге кёре, 3800 окъуучугъа жерлери болгъан 8 школ федерал программагъа къошулгъандыла.
Аланы къурулушларына республикагъа 4 миллиард сом чакълы бир бёлюнюрюкдю. Хар биринде 800 окъуучугъа жерле боллукъ мектепле Терекде, Экинчи Чегемде, Нальчикде ишленирикдиле.

Прималкинское элде 500 жери, Шордаковода - 200, Терс-Къолда - 150, Александровская станицада - 200, Нарткъалада 400 жери болгъан жангы мектепле сюелликдиле. Аланы къурулушларын 2023-2024 жыллада бардырыргъа белгиленеди.