КъМР-ни Башчысы Казбек Коков «Ёмюрлюк от» мемориалгъа гюлле салгъанды

 Ата журтну къоруулаучусуну кюнюнде КъМР-ни Башчысы Казбек Коков «Ёмюрлюк от» мемориалгъа гюлле салыргъа къатышханды.

1941-1945 жыллада болгъан Уллу Ата журт урушну кезиуюнде жан берген аскерчилени эсгериуге, урушну ветеранлары, республиканы жамауаты, аскерчиле, право сакълаучу органланы келечилери келгендиле. Эсде къаллыкъ мероприятиягъа КъМР-ни Парламентини Председатели Татьяна Егорова, КъМР-ни Правительствосуну Председатели Мусукланы Алий, КъМР-ни Башчысыны Администрациясыны оноучусу Мухамед Кодзоков, РФ-ни Президентини СКФО-да толу эркинликли келечисини аппаратыны КъМР-де баш федерал инспектору Тимур Макоев, парламентни депутатлары, правительствоу келечилери къатышхандыла.

Бюгюн, Ата журтну къоруулаучусуну кюнюнде, эсгериу мероприятияла Къабарты-Малкъарны битеу районларында бла шахарларында бардырыладыла.

Казбек Коков социальный сетьде кесини энчи бетинде былай жазгъанды: «Ата журтну къоруулаучусуну кюню – ол бек алгъа, кеси жашагъан къыралны  урушдан, террордан, экстремизмден эм къыйынлыкъдан сакълагъанланы байрамыды. Алагъа жюрек ыразылыгъыбызны билдиребиз. Белгилерчады, байрамны тарыхы 100 жыл мындан алгъа башланнганын».

«Бу кюнледе болгъан ишлени эсге алсакъ, байрам бизни барыбызгъа да -Къабарты-Малкъар Республикада жашагъанлагъа, Россей Федерацияны инсанларына бютюн уллу магъананы тутады. Бизни Президентибиз, Владимир Владимирович Путин, Донецк эм Луганск халкъ республикаланы  жалынчакъсызлыкъларын тохташдырыу бла байламлы указгъа къол салгъанды. Ол Россейге эм сагъынылгъан республикалада жашагъан миллионла бла тергелген инсанлагъа тарых байламлы оноуду, аны хайырындан  энди ол жерледе къоркъуусузлу эм мамыр жашау этерге ышаныулукъ барды. Миллет башчыбыз тюз оноу этгенине сёз да жокъду. Ол алай эсе, биз кючлю къыралда жашайбыз, кесини инсанларын не заманда да зорлукъдан сакъларыкъды, Россейни сейирлери къорууланырыкъдыла, къан тёгюлюуню тохтатырыкъды эм къарындаш халкъланы бир жанына атарыкъ тюйюлдю»,- деп чертгенди Къабарты-Малкъар Республиканы Башчысы чакъырыу сёзюнде, деп билдиредиле республиканы оноучусуну пресс-службасындан.

Бизни корр.