Сёлешиуню темасы – саулукъ сакълау системаны айнытыу

Къабарты-Малкъар Республиканы Башчысы Казбек Коков КъМР-ни саулукъ сакълау министри Рустам Калибатов эм Элбрус муниципал районну Ара район больницасыны тамата врачы Тилланы Хабибуллах бла ишчи тюбешиу къурагъанды. Аны чегинде республиканы саулукъ сакълаууну биринчи звеносуну жангыртыуну, Элбрус районну саулукъ сакълау системасын айнытыуну юсюнден сёлешиннгенди.

Республиканы оноучусу Элбрус посёлкада участок больницаны 520 квадрат метр кенглиги бла жангы больницалы корпусу ишлениригин алгъын айтханды. Мекямда жангы травматология ара орналлыкъды, ол а туристлени келиулери жылдан жылгъа кёбейе баргъан бу узакъ районда бек изленеди. Травматология ара ол санда бийик технологиялы болушлукъ тапдырырча шёндюгюлю диагностика эм хирургия оборудование бла жалчытылыныпды. Жангыртыуну программасыны чеклеринде анга 50 миллион сом бёлюнюрюкдю.

Участок больницаны эски махкемеси тюрлендирилликди, 20 жатар жери болгъан медицина учрежденияны ол жаны бла кючюн 7-жатар жерге дери кёбейтир муратлыдыла. Жангыртыуну программасына Элбрус муниципал районну Ара район больницасыны Тырныауузда поликлиника бёлюмю да къошулгъанды.

Казбек Коков, больницаны тамата врачы бла бийик квалификациялы кадрланы жетмегенлерини проблемасын сюзюп, больницаны специалистлерин жашар жерле бла жалчытырча онглагъа къараргъа буюргъанды.

Рустам Калибатов жангыртыуну программасына кёре 2021 жылда Заюковода Район больницаны поликлиника бёлюмюню, Май муниципал районда Ара район больницаны сабий поликлиникасыны, Малкада амбулаторияны, Нальчикде сабий поликлиниканы филиалыны тынгылы ремонтлары тындырылгъанын билдиргенди. 2022 жылда Нальчик шахарны поликлиникаларында эм район больницаланы поликлиника бёлюмлеринде ремонт ишле андан ары бардырыладыла. Министр билдиргеннге кёре, битеу объектледе ишлени биринчи жыл жарымда тамамлар муратлыдыла. Аны бла бирге жалчытылыныу да тындырылады, бусагъатда учреждениялагъа УЗИ-аппаратла берилип башлагъандыла.

Тынгылы ремонтдан сора да районлада саулукъ сакълауну жангы объектлерини къурулушлары бардырылады. Биринчи кварталны ахырына Черек районну Аушигер элинде 500 квадрат метр кенлиги болгъан жангы амбулаторияны хайырланыугъа берирге дейдиле. Жууукъ заманда Бахсан районну Куба-Таба элинде жангы амбулаторияны къурулушу башланырыкъды, ол 2022-2023 жыллагъа белгиленеди.