Эсгериу майданлны юсюнден указгъа къол салыннганды

Къабарты-Малкъар Республиканы Башчысы Казбек Коков «Къабарты-Малкъар Республиканы къуралыууну 100-жыллыгъы» деген эсгериу майдалны къуралыууну юсюнден» указгъа къол салгъанды. Республиканы таматасыны сайтында басмаланнган указгъа тийишлиликде, эсгериу майдалны описаниясы эм сураты, «Къабарты-Малкъар Республиканы къуралыууну 100-жыллыгъы» эсгериу майдалны  удостоверениясыны бланкыны юлгюсю къабыл кёрюлгендиле.

Документде айтылгъаныча, «майдал бла Къабарты-Малкъар Республиканы къуралыууну 100-жыллыгъына жораланнган байрамланы, жыйылыуланы сыйлы къонакълары эм алагъа къатышхан башха инсанла саугъаланырыкъдыла, жетишимлери, халкъланы маданиятларын жууукълашдырыуда, миллетле аралы байламлыкъланы кючлеуде, регионла, тыш экономикалы эм халкъла аралы байламлыкъланы тохташдырыуда ишлери ючюн».

Эсгериу майдалны Къабарты-Малкъар Республиканы къуралыууну 100-жыллыгъына жораланнган жыйылыуланы бардыргъанда къууанч халда КъМР-ни Башчысы неда аны буйругъу бла башха инсанла тутдурадыла. Эсгериу майдал бла бирге анга удостоверение да бериледи. Аны бериу 2022 жылны ичинде болгъанлай турлукъду, - деп айтылады указда.

«Къабарты-Малкъарны къуралыууну 100-жыллыгъы» эсгериу майдал 999-чу пробалы алтын тышлыды, латуньдан хазырланады, 32 миллиметр диаметрли тёгерекди, эки жанындан да къыйырлары ёргерек чыгъыпдыла. Аны ал жанында жылтырамагъан (матовый) фонда Къабарты-Малкъарны Къырал гербини сураты салыныпды, ёрге жанында «Къабарты-Малкъар Республика» деген жазыуу бла. Тёбен жанында «1922-2022» дата белгиленеди. Эсгериу майдалны бирси жанында жылтырамагъан фонда арада «КЪАБАРТЫ-МАЛКЪАР РЕСПУБЛИКАНЫ КЪУРАЛЫУУНУ 100-ЖЫЛЛЫГЪЫН БЕЛГИЛЕУГЕ» деген жазыу салыныпды.  Битеу суратла эм жазыула ёргерек чыгъарылгъан халда тамамланнгандыла.

Россейни Президенти Владимир Путин 2022 жылда Къабарты-Малкъар Республиканы 100-жыллыгъын белгилерге деген указгъа 2018 жылда къол салгъанды. Баш байрамла 2022 жылда сентябрьни аллында бардырыллыкъдыла.  Программада Москвада КъМР-ни кюнлерин, концертлени, битеуроссей илму конференцияланы, турист фестивальланы эм жаш тёлю этнографиялы форумланы бардырыу белгиленеди.