Шахарны орамларын тап халгъа келтиредиле

КъМР-ни Башчысы Казбек Коков Нальчикни жолларында   бардырыла тургъан тёрт уллу  къурулуш объектге къарагъанды, ала шахарны транспорт жаны бла магъаналы ызларына саналадыла. «Къоркъуусузлу качестволу жолла» миллет проектни чеклеринде уллу комплексли ишле  Кабардинская орамда, Шогенцуков, Ленина, Кулиева атлы проспектледе брдырыллыкъдыла.

Ишчи жолоучулукъда республиканы оноучусуну биргесине КъМР-ни транспорт эм жол мюлк министри  Аслан Дышеков, КъМР-ни цифралы айнытыу министри Ислам Ашхотов,   Нальчик шахарны администрациясыны башчысы Таймураз Ахохов   эм  жол ишлени бардыргъан биригиулени таматалары болгъандыла. 

«Биз республиканы жолларында иги кесек къурулуш ишлени бардырабыз, Нальчикге уа, республикабызны ара шахары болгъаны себепли, аслам эс бурабыз.  Къабарты-Малкъарны 100-жыллыгъына хазырланыу бла байламлы эм магъаналы орамлагъа тынгылы ремонт этиледи.    Битеу ишле шёндюгюлю технологияла бла бардырыладыла.  Шахарда орнатылгъан чыракъла токну аз къоратадыла, ала жарытхан да иги этедиле. Битеу да Нальчикни жолларын тап халгъа келтириу бла байламлы этилген къоранчланы юсюнден айтсакъ, ала бир миллиард сомдан асламдыла», — дегенди Казбек Коков объектлеге къарагъан кезиуледе.

Кабардинская орамны ремонту озгъан жыл башланнган эди.  Шёндю жолчула Кабардинская бла Идарова орамла бирге къошулгъан мюйюшден тебиреп, шахардан тышына чыкъгъан жерге дери кенгерте турадыла.  Бу участок автомашинала, ол санда жюк ташыгъанла да, аслам жюрюген жерге саналады.  Сагъынылгъан тийреледе жангы чыракъла орнатылынырыкъдыла, адамла жолну ётген жерле да тапландырыллыкъдыла.  Аны бла бирге саулай да ток баргъан  ызла  алышындырыладыла. Ара  проспектде   Ногмова орамдан Осетинская орамгъа баргъан жанына суу канализация быргъыланы тазалап,  тап мардалагъа келтиредиле. 

Шогенцукова проспектде  суу эм канализация баргъан быргъыланы алышындырлыкъдыла. Планнга кёре, тротуарла тап боллукъдула эм жангы чыракъла  жанарыкъдыла.     Кулиева атлы проспектде  жангы асфальт боллукъду, автомашиналаны салырча онгла  этерикдиле эм жамауат транспорт тохтаучу жерлени да тапландырлыкъдыла.  Он тёртюнчю гимназия къатында орамланы жарытхан жангы чыракъла жанарыкъдыла, светофорланы   да алышындырлыкъдыла.  Андан сора да Шортанова орамдан Кулиева атлы проспектге чыкъгъан жер  кенгертилликди, алайгъа светофор да салынырыкъды.  Ленина атлы проспектде жангы асфальт боллукъду, тротуар плиткаланы тюрлендирликдиле, шёндюгюлю светофорла орнатырыкъдыла. Басманы юйюню къатында чакъырыучу кнопкасы болгъан светофор салынырыкъды. Ленина эм Кулиев атлы проспектледе  ток баргъан чыбыкъла жер тюбю бла барырча этилликдиле, ол проект «Таза кёк» деген программа бла  тамамланады. Ремонт барлыкъ орамлада 3000 тюрлю-тюрлю жангы терекчикле ёсерикдиле.

Казбек Коков къурулушчула бла ушакъ бардыргъанда былай айтханды: «Сиз тарых магъаналы ишлеге къатышасыз. Кулиев атлы проспектде 40 жылны ичинде хазна зат тюрленмегенди, капитал ремонт бир кезиуде да бардырылмагъанды. Бизни таматаларыбыз бу ариу орамланы ишлеген эселе,  сиз энди аланы жангыдан шахарчылагъа эм  бери  келген къонакълагъа таплыкъгъа деп, кёп жыллагъа тынгылы этесиз. Битеу ол ишле бу тийреледе жашагъанланы жашауларын игилендирликди». Дагъыда республиканы оноучусу къурулшчулагъа шахардан чыкъгъан битеу жолла тап халгъа келтирилликлерин эсгертгенди.

 «Шёндю бардырыла тургъан ишле шахарчылагъа эм ары келген къонакълагъа бир кесек чырмайдыла. Ол затланы ангыларгъа керекди. Битеу хар  затда   жангыртылынып бошалса, адамлагъа тап боллукъду,  ала ол ишлеге къууанырыкъдыла», - дегенди Казбек Коков ушагъыны ахырында.

Бизни корр.