Промышленность бёлюмню айнытыу жолларына къарагъандыла

Къабарты-Малкъарны Башчысы республиканы промышленность, энергетика эм сатыу-алыу министри Шамиль Ахубеков бла тюбешгенди.

 Тюбешиуню кезиуюнде промышленность комплексде болум сюзюлгенди,   мындан арысында аны айнытыу жолларына, инвестиция проектле жашауда къалай бардылгъанларына, федерал министерствола, сатыу-алыу ишлени жюрютген институтла эм Россей Федерацияны алчы къырал  компаниялары бла байламлыкъла къалай жюрютюлгенлерине къаралгъандыла, деп билдиргендиле КъМР-ни Башчысыны бла Правительствосуну пресс-службасындан.

 Республиканы оноучусу Тырныаузда вольфрам-молибден болгъан жерни мурдорунда тау-магъадан комплекс къурауну юсюнден энчи айтханды. Ол проект «Ростех» къырал корпорацияны  эм РФ-ни Промышленность эм сатыу-алыу министерствосуну кючю бла бардырылады. Къураллыкъ комплексге магъаданны терен жарашдырлыкъ Россейни регионларында орналгъан бир ненча производство майданла киредиле. Битеу да жети жюзден аслам ишчи жер  ачыллыкъды.

 2021 жылда проект ишле бошалгъандан сора, комбинатны къурулушу башланнганды, келир жыл  магъаданны сынау халда чыгъарып башларыкъдыла. Жарашдырылгъан планнга кёре, 2024 жылда комбинат толусунлай ишлеп тебирерикди.

 Шёндю ишле асламысында къурулуш майданда эм проектни инфраструктура жаны бла байламлы жерлеринде бардырыладыла. 

Казбек Коков  арт он жыллада къыйын финанс болумлагъа тюшюп, жумушларын тийишлисича бардыралмай тургъан, тюрю-тюрлю иеликде болгъан предприятияланы ишлерин тирилтирге себеплик этерге кереклисин айтханды. Бардырылгъан тинтиулеге кёре, айныргъа жарарыкъ бек аздан жыйырмагъа жууукъ промышленность майданла бардыла. Къабарты-Малкъарны Башчысы ол предприятиялагъа болушлукъ этерге кереклисини юсюнден буюруу бергенди. Биригиулеге инвесторланы излерге, чыгъаргъан продукцияларын сатаргъа жерле табаргъа, производство кючлерин республикада болгъан къурулуш материалланы запасларына тийишлиликде   къураргъа кереклсин чертгенди.

 Бизни корр.