Экспортну айнытыугъа алланып

Быйыл Къабарты-Малкъар эки федерал проектге къатышырыкъды: «Агропромышленный комплекс продукцияны экспорту» эм «Халкъла аралы  кооперация бла экспортну айнытыуда система амалла». Аны бла бирге былтыр  «Жумушланы экспорту» деген регион проект да жетишимли тамамланнганын белгилерчады. Аны юсюнден бизге КъМР-ни Экономиканы айнытыу министерствосундан билдиргендиле.

Бюгюнлюкде республика экспортну 83,9 процентин  СНГ-ны къыралларына ашырады.  Андан Къазахстаннга - 23,1,  Узбекистаннга - 14,4, Къыргъызстаннга -  10,3, Азербайджаннга - 8,3 эм Беларусь Республикагъа 5,7 процент жетеди.

Экспортха жиберилген продукцияны ёсдюрюуде мелиорация амал тири хайырланады.  Тийишли  ишле  план бла белгиленнген 10220 гектардан 10787,7 гектарда, неда  105,5 процентге артыкъда бардырылгъандыла.
Ол санда «Агропромышленный комплекс  продукцияны экспорту» регион проектге кёре, 40 предприятия бла  817,55 миллион сом багъасына 48 келишим этилгенди.  Продукцияларын тышына  жиберген агропромышленный комплексни производительлерине къыралны жанындан да ахшы себеплик этиледи. Ол санда  льготалы ёнкюч,  лизинг бериледи,  продукцияны транспортировкасына этилген къоранчланы бир кесеги къайтарылады,  жау сыгъылгъан культураланы айнытырча, АПК-ланы эм башха объектлени къурулушун бардырыргъа, жангыртыргъа да  болушлукъ тапдырылады.

Былтыр халкъла аралы электрон халда сатыу-алыу бардыргъан площадкалада республиканы 44 предприятиясыны продукциясы киргенди. Андан сора да,  халкъла аралы «WorldFood», «FoodExpo Qazaqstan»  эм башха даражалы кёрмючледе гитче эм орта бизнесде уруннган тёрт  субъект къатышыргъа онг тапхандыла. Республикада экспортха болушлукъ тапдыргъан ара 5,387 миллион доллар багъасына онтёрт предприятия тутхучлукъ этгенди.
Саулай алып айтханда, Къабарты-Малкъарда эм уллу экспортёрладан бири «Риал» биригиу ишин тохтатханына да къарамай, башха спиртсиз  продукцияладан 63,6 процент ёсюм эсленеди.