Вертолёт огъесе геликоптер?

 – 1929 жылда 8  февральда орус тилге «вертолёт» деген сёз киреди. Авиаконструктор Николай Ильич Камов къурашдыргъан  «Къызыл инженер» КАСКР-1 аппаратха ма алай атагъан эди. Ол кеси да аны эмда Скржинскийни тукъум атларыны ал сёзлеринден къуралгъанды. «Вертолёт» деген сёзю болгъан эм биринчи документге уа ОСОАВИАХИМНИ Техника комиссиясыны 1929 жылда 8 февральда басмаланнган протоколу саналады.

Шёндю вертолёт болгъан, урушха дери уа быллай аппаратлагъа «геликоптер» дей эдиле. Ол сёзню француз тилден (hélicoptère) 19-чю ёмюрню ахырында алгъандыла. Камов къурагъан зат а, техника жаны бал алып къарагъанда, «автожир» эди.

Вертолётну автожирден не башхалыгъы барды десегиз, экинчисин ёрге бир пропеллер кётюреди, алгъа уа энтта да бири тюртеди. Бирле уа «вертолёт» деген сёз француз тилде «gyroplane» сёзню магъанасын тутады да дейдиле. Энтта да бир оюм а вертолётла чыгъарыучу «Vertol» компанияны атындан чыкъгъанды деп белгилейдиле.

1959 жылда совет делегация АБШ-гъа барады. Аны къауумунда белгили конструктор Михаил Леонтьевич Миль да бар эди. Ала анда Sikorsky S-58 эм Vertol V-44 вертолётладан бирерин сатып аладыла. Ма андан сора быллай аппаратлагъа бизде «геликоптер» угъай, «вертолёт» деп башлайдыла.