Сёз гидроэнергетиканы айнытыуну юсюнден баргъанды

Къабарты-Малкъар Республиканы Башчысы Казбек Коков РусГидро акционер обществону правленини председатели эм генеральный директору Виктор Хмарин бла эки жанлы тюбешиу бардыргъанды. Ол шёндю Къабарты-Малкъаргъа ишчи жумуш бла келип турады. 

Тюбешиуню кезиуюнде Къабарты-Малкъар Республиканы жерлеринде гитче гидроэнергетиканы айнытыу бла байламлы программаны соруулары сюзюлгендиле. Гитче гидроэлектростанцияланы ишлетиу бла байламлы Шимал-Кавказ федерал округну аламат онглары болгъаны себепли, сёз аланы юсюнден да баргъанды.

Гитче гидроэлетростанциялада электрокюч чыгъарыу экология жаны бла къоркъуусузлукъну излемлерине келишген хар заманда да ток берип тургъан амалгъа саналады. Андан сора да, узакъ жерледе орналгъан районлагъа ток бирча терк жетмегени бла байламлы, аланы электрокюч бла жалчытыуда гитче гидроэлектростанцияланы магъаналырыны юсюнден да айтылгъанды.   

Казбек Коков белгилегеннге кёре, республикада энергетиканы айнытыу бла байламлы бирлешип бардырылгъан  инвестициялы проектлени хайырланыу экономиканы айнытыугъа да магъанасы барды.

Виктор Хмарин айтханнга кёре, хар  гидроэлектростанция кесине кёре сейирликди, аны жетишимли къурулушу уа - бизге республика бла къыйматлы ишлеуюбюзге шагъатлыкъды.  Республикада эки гитче гидроэлектростанцияны ишлеу бла байламлы проектле да сюзюлгендиле.   

Эсигизге салайыкъ, 2020 жылны кёрюмдюлерине кёре, биринчи комплексли регион аралы инвестициялы рейтингде «Россейни гитче гидроэнергетикасыны лидери» деген номинацияда,  Къабарты-Малкъар Республика хорлагъанын. Аны юсюнден билдириуню   энергетиканы жангыдан хайырланыу  ассоциациясы  басмалагъан эди.

 Республикада   2016 жылда Зарагиж деген гитче гидроэлектростанция ишленнгенди, 2020 жылда Огъары Малкъар  МГЭС, шёндю Огъары Бахсанда Адыр-Сууда гитче ГЭС-ни проекти этиле турады, аны 2027 жылда хайырланыргъа берирге мурат барды.  

Бюгюн Черек гитче ГЭС-ни бетонуну биринчи кубометирин салыу боллукъду.  Ол регионну уллу энергокомплексини -Тёбен-Черек каскадны тёртюнчю тапкасыды, ары уа юч гитче гидроэлектростанцияла: Кашхатау, Аушигер  эм Зарагиж ГЭС-ле киредиле. Аланы битеу да кючлери 155,7 МВт болады. Черек гитче ГЭС-ни 2024 жылда ишлеп бошарыкъдыла.

 Бизни корр.