Сабанчылагъа солуу кюнле жокъдула

Кёп бомай Россейни эл мюлк министри Дмитрий Патрушев Брянск областьда оперштабны кенгешин бардыргъанды. Ол агропромышленный комплексни эм аш-азыкъ рынокну айнытыугъа жораланнганды. Анга видеоконференция халда профильли ведомстволаны келечилери, ол санда КъМР-ни эл мюлк министри Хасан Сижажев да къатышханды.  

 Дмитрий Патрушев, тюбешиуню ача, агропромышленный комплексде къармашханлагъа солуу кюнле болмагъанларын белгилегенди, бютюнда тирликни жыйгъан, урлукъ салгъан кезиуледе.

- Быйыл пандемия бла байламлы 30 октябрьден башлап 7 ноябрьге дери Россейде солуу кюнле бериледиле. Бир-бир субъектледе болумгъа кёре ала алгъаракъладан башланнгандыла, болсада эл мюлкде ишни артталлыда тохтатып къояргъа жарарыкъ тюйюлдю. Бусагътадагъы чууакъ кюнлени бошуна жибермезге кюреше, сабанчыла, малчыла кезиулю ишлерин тири бардырадыла. Аланы продукцияларына тюкенледе сурам болгъанлай турады. Аны бла бирге мюлкледе эм предприятиялада да Роспотребнадзорну излемлери сакъланырча мадарла этиледи, - дегенди Дмитрий Николаевич.

Министр быйылны эсеплерине кёре къыралны аграрчылары иги жетишимле болдургъанларын, мирзеуден 120 миллион эм жаулу битимледен да 21 миллион тонна жыйгъанларын чертгенди. Аны бла бирге чёплеуден, соядан, рапсдан да былтырдан эсе иги тирлик алыннганды. Тахта кёгетледен – 7, балтуз чюгюндюрден – 33 эм картофдан 5,9 минг тонна жыйылгъанды. Ол санда кюзлюк мирзеуден сабанлагъа 18 миллион тонна урлукъ чачылгъанды.

Къабарты-Малкъарда эл мюлкде болумну юсюнден доклад эте, Хасан Сижажев быйыл будайдан бла арпадан – 960, нартюхден – 720, картофдан – 120, тахта кёгетледен – 276 эм наныкъладан 470 минг тонна тирлик алыннганын айтханды. Аны бла бирге бусагъатда бир-бир мюлкледе тирлик жыйыу бара тургъанын, ала графикден кеч къалмай бошаллырыкъларын да эсгертгенди.