Мария Ласицкенеге аэропортда къууанч халда тюбегендиле

Бийикге секирип Олимпиадалы чемпионкагъа Мария Ласицкенеге эм аны юйретиучюсюне, Россейни сыйлы тренерине Геннадий Габриляннга Минеральные Воды шахарны аэропортунда Къабарты-Малкъардан баргъан келечиле тюбегендиле.

Айтхылы спортчубузну алына КъМР-ни Башчысыны Казбек Коковну буюруу бла  вице-премьер Марат Хубиев, спортну министри Ислам Хасанов, Прохладный шахарны жер-жерли администрациясыны башчысы Игорь Тараев, жууукъ адамлары, шуёхлары, спорт жамауатны келечилери эм журналистле келген эдиле. Олимпиада чемпионкагъа тёреде болуучусуча, туз-гыржын бла «Кабардинка» эм «Терские казаки» ансамбльлени тепсеулери бла тюбегендиле.

Биринчи алгъышлауладан сора, журналистлени сорууларына жуууапла бере, Мария Ласицкене былай айтханды: «Бек къууаннганма юйюме къайтханыма. Кесим жюрюген школгъа барыргъа  сакълап турама, анда кёп сабий окъуйду, алагъа алтын майдалымы кёргюзтсем, ол уллу къууанчды манга».  Геннадий Габрилян билдиргеннге кёре, Мария дунияда бек уллу жетишимлени болдургъанды, алай аны бла чекленип къалмай, энтта да ишлерге, къаты кюреширге боллукъду, дегенди айтхылы тренер. 

Тамбла Правительствону юйюнде колонналы залда къууанчлы халда айтхылы спортчубузгъа республиканы эм бийик «Къабарты-Малкъар Республиканы аллында къыйыны ючюн» деген саугъаны бериу бла байламлы къууанчлы жыйылыу боллукъду. Аллай саугъа бла белгилерге КъМР-ни Башчысыны буйругъу 30 августда чыкъгъанды.

Къууанчлы жыйылыудан сора, ол кюн КъМР-ни Башчысы Казбек Коков  Мария Ласицкене эм Геннадий Габрилян  Нальчикде Олимпия аллеяда белгили спортчугъа жораланнган, эсде къаллыкъ къаннганы орнатыугъа къатышырыкъдыла.

Андан сора 12 сагъат 30 минутда Уверсал спорт комплексни майданыны аллында республиканы белгили артистлери  жырла айтырыкъдыла,  алайгъа келгенле спорт  жамауат эм сабийле бла тюбешиу боллукъду.

Он бешинчи сентябрде айтхылы спортчу къызыбызны жетишимин эм аны юйретиучюсюн Прохладый шахарны спорт школунда  белгилерикдиле.   Мария анда спорт жарауланы этип тургъанды.

Прохладный шахарны жер-жерли администрациясыны Советини оноууна кёре, ол школа энди Олимпиадалы чемпионканы атын жюрютюрюкдю.   Андан сора мероприятияла  шахарны ара стадионунда бардырыллыкъдыла, спорт байрам шахарны «Энергетик» футбол клубуну бла Ростовну «Нахичевань» командасыны тюбешиулери бла бошаллыкъды. 

Бизни корр.