Аманлыкъчылыкъны бир ниетлилик хорларыкъды

Къабарты-Малкъар Республиканы Жамауат палатасында «Терроризмге къажау кюрешде жамауатны магъанасы» деген темагъа жораланып, «тёгерек стол» бардырылгъанды.

Жамауат палатаны таматасы Хазратали Бердов белгилегеннге кёре, ючюнчю сентябрь Терроризмге къажау кюрешде бир ниетлиликни кюндю, сора Беслан шахарда болгъан бушуулу ишлени эсгериу кюнюдю. Ол заманда анда терсликлери болмагъан жюзле бла адамла ёлгендиле, асламысында, тиширыула бла сабийле.

Х. Бердов жыйылгъанлагъа КъМР-де 2005 жылда 13 октябрде болгъан ишлени эслерине тюшюргенди, ол кезиуде Нальчикни право сакълаучу органларына 150 боевик чабыууллукъ этген эдиле.

«Шёндю Россейде, Къабарты-Малкъарда да террористле хазна баш кётюрмейдиле. Алай шёндюгюлю террористле ахырда бир жанына кетмегендиле, болумгъа кёре кеслерин жарашдырып турадыла. Аланы жаланда бирлешсек хорларгъа боллукъду, бир-бирни ангылап ишлесек», - дегенди Х. Бердов, сора ол жыйылыугъа къатышханланы кеси оюмларын да билдирип, тынгылы предложенияла айтыргъа чакъыргъанды,

Къабарты-Малкъар Республиканы экстремизмге къажау кюрешде ишлени бардырыу жаны бла министри Залим Кашироков айтханнга кёре, «Терроризмге къажау кюрешде бир ниетлиликни кюню» деген сёзлени магъанасын ангылата, ол магъаналы жумушну тамамлауда бир ниетлиле  бирлешип эмда жамауат институтланы болушлукълары да болмаса, иш къыйматлы бардырылмазлыгъын чертгенди.

З. Кашироковну оюмуна кёре, терроризм бир жанына кетмегенди, ол битеу адам улугъа уллу къоркъуу болгъанлай къалады.

Арт кезиуледе терроризм геополитика сорууланы тамамлауда хайырланылады, аллай ишле Жууукъ Востокда, Сирия да, Ирак да болгъандыла, Шимал Кавказда да алай этерге кюрешгендиле.

З. Каширков террористлени къолларындан ёлген право сакълаучу органланы, жамауат эм дин къуллукъчуланы келечилерин унутмазгъа чакъыргъанды.   

«Бизни бирлешип ишлегенибиз кюч береди. Алыкъа къайгъыла бошалмагъандыла, ол заманда Нальчикде болгъан бушуулу ишле энтда да унутулмагъандыла», - дегенди министр.  Сора З. Кашироков,  терроризмни жаланда бирлешип ишлеу  бла хорларгъа боллугъун, чертип айтханды.

КъМРни прокуратурасыны келечиси Алим Мирзов бир ниетли болуп ишлеуню магъанасын белгилегенди эм республикада къырал власть органла терроризмге бла экстремизмге къажау  кюрешде кёп затла этгенлерин айтханды.

А. Мирзов ачыкълагъан шартлагъа кёре, озгъан жылла бла тенглешдиргенде республикада террористлени баш кётюрюулери иги кесеге азайгъанды, аны бла бирге аланы шёндюгю болумлагъа кеслерин тап жарашдыргъанларын, ол санда   адамланы терс жанларына бурургъа Интернетни тири хайырланнганларын  да чертгенди. 

«Власть органланы, право сакълаучуланы эм жамауатны баш борчларындан бири, не да этип терроризмге къажау сюелиудю», - билдиргенди А. Мирзов.

КъМР -ни миллетлени ишлери жаны бла  эмда жамауат институтла бла байламлыкъла жюрютюу министрни къуллугъун толтургъан Анзор Курашинов айтханнга кёре, жашау шёндю терк барады, аны бла байламлы жаш тёлюню дуниягъа къарамы, эслилиги да алгъа келеди.

 А. Курашинов айтханнга кёре, министр хар жаш адам бла да ушакъла бардырып туралмайды, былайда жамауат институтла, дин жаны бла ишлеген биригиуле алагъа болушлукъгъа келедиле, ишни иги бардырадыла.

Тюбешиуню ахырында Х. Бердов кётюрюлген сорууланы республикада жашагъан хар инсаннга магъаналыкълыгъын чертгенди. 

 Бизни корр.