Къышда къанатлыла адам къолун излейдиле

Къышда жылы жерлеге учмай  къалгъан къанатлылагъа кеслерин аш бла жалчытыргъа  бек къыйын болады. Анга да къарамай, сууукълада жылыныр ючюн ала иги багъылыргъа керекдиле. Аны ючюн алагъа адамны болушлугъу аламат себеплик этеди.

Аны бла байламлы къышны аллында Къабарты-Малкъарны къырал  бийик тау заповеднигини келечилери   республиканы школчуларына бла садиклеге жюрюгенлеге   къанатлылагъа  болушургъа керегин ангылатырча  ачыкъ  дерсле къурагъандыла.  Андан сора да, заповедник  былтыр «Къышха къалгъан къанатлылагъа болуш» деген акция бардыргъанды. Аны эсеплери алгъаракълада белгили болгъандыла.

Акциягъа республиканы школларындан 130-ден аслам  окъуучу къатышхан эди. Эм тири уа Нальчикни 28-чи номерли школуну, Звёздный элни орта школуну эм Къашхатауну «Радуга» сабий садыны келечилери болгъандыла.

Сабийле ата-аналары бла бирге агъачдан уяла  эм къолда  болгъан материалладан  аш берген орунла да ишлегендиле. Заповедникни ишчилери уа къанатлылагъа къаллай аш берирге жарагъанын, аны мардасын эм башха затланы да билдиргендиле. Сёз ючюн, бирлерине жарагъан зат   бирсилерине хата салыргъа боллукъду.  Дагъыда сабийле башха кёп шартла бла шагъырей болгъандыла.

Быйыл Къабарты-Малкъарда къыш хазна сууукъ болмагъанды. Алай адам къолундан аш излеген къанатлыланы саны уа аз тюйюл эди. Ала кёбюсюнде чорбат эмда ала чыпчыкъла, сора кёгюрчюнледиле. Акцияны чеклеринде окъуучула тинтиу ишле да бардыргъандыла, сабий садда, школда, скверде, паркда орналгъан аш орунлагъа къаллай къанатлыла  келгенлерин, аланы санларын эмда башха затлагъа эс буруп жазып тургъандыла. Ала эм биринчи табийгъатха аяулу кёзден къараргъа кереклисин ангылагъандыла. Къанатлыла къурт-къумурсхаланы ашап, азайтып, аны бла табийгъатха, эл мюлкге да хайыр келтиргенлерин билгендиле.

Ахырында чыгъарылгъан эсеплеге кёре, биринчи жерлеге: Жаникаланы Марат, Настуланы Азамат, Мызыланы Мадина, Османланы Адбул, Казанцева Елизавета, Бетуганова Сатаней, Шогенов Кантемир, Ансокова Лиана, Яшишин Артём, Масаев Дамир эм Гаунова Милана чыкъгъандыла. Ала дипломлагъа бла эсде къалырча саугъалагъа тийишли болгъандыла. Акциягъа къатышханланы барына да дипломла берилгендиле.