Уллу Ата журт урушну ветеранларына артыкъда сакъдыла

Бахсан районну ол атлы шахарында,  эллеринде жангыз тургъанлагъа, кёп сабийли юйюрлеге, къолайсызлагъа болушлукъ этилгенлей турады. Уллу Ата журт  урушну ветеранларына бла эрлери ол къазауатдан къайтмай къалгъан тиширыулагъа артыкъда сакъдыла. Район администрацияны   башчысыны    социал жумушла жаны бла  орунбасары  Заур  Казанов билдиргеннге кёре,  былтыр урушха къатышханланы хар бирине  10 минг  сом бёлюннгенди. Эрлери урушда  ёлгенлеге да  5 мингишер  сом берилгенди.
Ол къауумлагъа болушлукъ этиуге районда предприятила, организацияла эм энчи адамла да къошуладыла деп Заур Казанов юлгюге Баксанёнокда "Касаево" эл мюлк предприятияны келтиргенди. Аны  башчылары бу элде  жашагъан ветеранланы хар бирине  10 000 сом, эрлери урушда  ёлген тиширыулагъа  5000-шер сом берип  къууандыргъандыла.  Бу ишге ол элли предприниматель Мухамед Ныров да къошумчулукъ этгенди -  ветеранлагъа  бешишер минг сом  бёлгенди. Псычох элде "Карат" фирманы дирекциясы да   аллай болушлукъ этгендиле.

-Аладан сора да бардыла чомартлыкъ этгенле, сай болсунла,-дейди администрацияны къуллукъчусу.- Жарсыугъа,  ветеранла аздан аз бола барадыла.  Аланы асламысыны жыл санлары токъсандан иги да аталгъанды.  Бирлери тёшекдиле, башхаларын да  заман хорлагъанды. Кёбюсю юйден чыкъмайдыла.  Баш иеси урушда жоюлгъан да бир тиширыу барды.  Бюгюнлюкде Бахсан  районда жаланда тёрт ветеран къалгъанды.  Аланы барысына да  районну  администрациясы  быйыл да  кёз-къулакъ болгъанлай, къолларындан келген болушлукъну этгенлей турлукъду.

Администрацияда  социал жумушла ючюн жууаплыла жашаулары келген адамланы, жангыз къалгъан къарт-къарыусузланы юйлеринде  терк-терк боладыла, аланы  юй  жумушларын тамамлаугъа, саулукъларына къаратыугъа да болушадыла, кёп тюрлю башха жумушла да  этедиле.

Суратда: Бахсан районда социальный болушлукъ этген арада.