Медицина болушлукъну сылтаусуз тапдырыргъа, аны качествосун игилендирирге борч салыннганды

Кёп болмай Чегем районну ара больницасында  конференция болгъанды. Анда былтыр  тамамланнган ишлени эсеплегендиле. Анга КъМР-ни саулукъ сакълау министрини орунбасары Татьяна Аникушина эм Чегем районну администрациясыны башчысыны орунбасары Жанна Арипшева  къатышхандыла.   
Саулукъ сакълау учрежденияны ишини эмда келир заманда къаллай жумушла тамамланырыкъларыны юсюнден аны баш врачы Елена Кокова билдиргенди. Жыйылыуда асламысында  бегирек жарсытхан жумушланы сюзгендиле  эмда иги кёрюмдюлеге жетер ючюн не этерге тийишлисин да айтхандыла. Ол санда медицина болушлукъну сылтаусуз тапдырырча, качествосун игилендирирча, жамауат саулукълу болурча не мадарла этилгенлери эм профилактика жаны бла къаллай ишле бардырылгъанлары да сюзюлгенди. Андан сора да, тюбешиуде ырысхы-техника онгланы, кадрланы, ундурукъланы хайырланыу не халда болгъаныны, къаллай бир ахча тюшюрюлгени эмда къоранчланы юсюнден да отчёт этилгенди.

Быйыл тамамланыллыкъ ишлени юсюнден айтханда, стационарда  тюрлю-тюрлю   медицина болушлукъ  берилирча онгла къуралырларына эм аланы качестволары  да иги болурларына къайгъырыллыгъы белгиленнгенди.  

Ахырында,  больницаны ишин мындан ары да къыйматлы бардырырча эсгериуле этилип,  план жарашдырылгъанды. Анда туберкулёздан  бла онкологиядан  ауругъанлагъа багъыуну игилендирирге, профилактиканы кючлендирирге, жыл санлары келгенлени арасында  диспансеризацияны  тийишлисича ётдюрюрге  эм саулай да районну саулукъ сакълау бёлюмю айнырча мадарла этерге да белгиленеди.