Билимге талпындыргъан араланы энчи белгилегендиле

Кёп болмай   Къабарты-Малкъарда «Точка роста» билим бериу араладан тёртюсю РФ-ни Жарыкъландырыу министерствосуну сыйлы грамоталарына тийишли болгъандыла. Аланы КъМР-ни Жарыкъландырыу, илму эмда жаш тёлюню ишлери жаны бла министри Анзор Езаов бергенди. 

Быйыл сентябрьни ахырында «Билим бериу» миллет проектни чеклеринде саулай къыралда  2951 чакълы «Точка роста» ара ачылгъанды.   Анга жоралап профильлли ведомство «Марафон открытий» деген акцияны бардыргъанды. Ол сегиз регионда ётгенди, ол санда Къабарты-Малкъарда.  

Программагъа кёре тюрлю-тюрлю предметледен  тюзюнлей халда дерсле, «Точка роста» манга не бергенди?» деген конкурс, «Точка роста» араны юсюнден  устазла, ата-аналары бла  школчула  хазырлагъан   видеосюжетле да кёргюзтюлгендиле. Алай бла   «Эм иги видеоролик» номинацияда  Быллымны арасы биринчи жерни алгъанды, Лячинкъаяны, Нартанны эм  Чегемни келечилери уа сертификат  къоллу болгъандыла.
Саугъаланнганланы арасында къошакъ билим бериуню педагогу, сабийлени бла жаш тёлюню окъутхан профессионалланы арасында  битеуроссей конкурсну финалисти, устазланы  битеудуния саугъасыны лауреаты   Залина Мамиева да болгъанды.  

Анзор Езаов, хорлагъанланы алгъышлай, эки жылгъа республикада 69 «Точка роста» ачылгъанын айтханды. Мындан арысында да  элледе окъугъанла   мектепледе иги билим алырча ведомство  бар онгла къурарыгъын  чертгенди.