Сайланнган вузла грант къоллу боллукъдула

В.М.Коков атлы Къабарты-Малкъар къырал аграр университетни алим советини залында  республиканы бийик окъуу юйлерини  ректорларыны советини  жыйылыуу болгъанды. Аны ишине КъМР-ни  билим бериу, илму эмда жаш тёлюню ишлери жаны бла министрини къуллугъун толтургъан  Анзор Езаов да къатышханды.

Ол жыйылыуда эки  иш сюзюлгенди: РФ-ни  Билим бериу эм илму  министерствосу жарашдыргъан   академиялы алчылыкъны  программасы эмда советни председателин айырыу.   Советни келечиси  Х.М.Бербеков атлы  Къабарты-Малкъар къырал университетни  ректору Юрий Альтудовну  РФ-ни  Билим бериу, илму  министерствосуну  программасын окъугъанды. Андан сора да аны проектин жашауда къалай бардырыргъа кереклисини юсюнден кесини оюмун айтханды.

-Программаны министерствода жарашдыргъандыла, ол  къыралны бийик окъуу юйлерини  ректорларыны эмда  къыралны Президентини Администрацияны сюзюуюн да ётгенин чертирчады,-дегенди Юрий Альтудов.

Белгилисича, министерство быйыл  программагъа кирирге боллукъ 724  вуздан 100-120 бийик окъуу юйню айырыкъды. Ол он жылны ичинде бардырыллыкъды. Сайланнган вузла грант къоллу боллукъдула.

Анга къошулур  ючюн  бийик окъуу юй академиялы рейтингге кирирге, аны кюндюзгю бёлюмюнде  тёрт мингден аз  студенти болмазгъа, битеу бюджети  миллиард  сомдан аз болмазгъа, вузну илму- излем ишден тюшген файдасы беш процентден аз болмазгъа кереклисини юсюнден да айтханды ол.

КъМКъУ-ну ректору республиканы вузларыны  илму-билим бериу  жаны бла биригип ишлерге боллукъларын да белгилегенди. Аны ол предложениясына советни келечилери ыразылыкъларын билдиргендиле.

Андан сора  кенгешге къатышханла  экинчи жумушну сюзюуге киришгендиле. Бусагъатха дери республиканы  ректорларыны советини  председателини къуллугъун толтургъан  Искусстволаны Шимал- Кавказ институтуну ректору Рахайланы Анатолий  бу къуллукъгъа Аслан Апажевни кандидатурасын кёргюзтгенди. Алай бла жыйылгъанланы бир кибик ыразылыкълары бла  КъМР-ни бийик окъуу юйлерини ректорларыны  советини председателине КъМКъАУ-ну ректорун айыргъандыла.

Жангы председатель, анга аллай магъаналы ишни  буюргъанлары ючюн Анзор Езаовха эмда  коллегаларына ыразылыгъын билдирип,  бу ишде  къолундан келгенни аямазлыгъын чертгенди.

"Сёзсюз, манга дери председательлик этип келген тамата коллегаларым  КъМР-ни вузларын бийик жетишимлеге жетдирир ючюн кёп  иш этгендиле, аланы ол башламчылыкъларын сакъларгъа  эмда  мындан ары айнытыргъа битеу кючню салып ишлерикме",-деп  белгилегенди Апажев.

Юрий Альтудов  советни келечилерини атындан  алгъыннгы председатель Рахайланы Анатолийге ыразылыгъын билдиргенди эмда республиканы билим бериу, илму эмда жаш тёлюню ишлери  жаны бла министрини къуллугъун толтургъан Анзор Езаовха кенгешге къатышханы ючюн ыспас этгенди.