Этген ахшылыкълары кёрюнмей къалмагъанды

«Биз биргебиз» битеуроссей бир бирге болушлукъ акцияны чегинде  къыралыбызда коронавирус инфекцияны жайылыууну кезиуюнде жамауатха социал болушлукъ жаны бла  къыйын салгъаны ючюн, Къабарты-Малкъар Республикада тамата тёлюню болушлукъ бла жалчытыучу волонтёрланы регион штабыны таматасы, КъМКъУ-ну медицина колледжини ишчиси  Залина Кушхова Россей Федерацияны Президенти  Владимир Путинни атындан  Ыразылыкъ къагъыт алгъанды. Аны юсюнден  КъМКъУ-ну пресс-службасындан билдиргендиле.

Тамата тёлюню болушлукъ бла жалчытыу  штаб «Продвижение» жандауурлукъ  ресурс  араны мурдорунда, быйыл мартны ортасында,  COVID-19 бла байламлы чекле салыннган кюнде,  къуралгъанды. Залина Кушхова айтханнга кёре, бюгюнлюкде волонтер штабда 250 адам урунады,  аланы асламысы КъМКъУ-ну медицина бёлюмюнде бла медколледжинде окъуйдула. Битеу да бирге  ала  600  къартха   болушхандыла: тюкенден кереклени эмда медикаментлени сатып алып келтиргендиле, кир-кипчикни чыгъаргъандыла, юй жыныуарланы хауагъа чыгъаргъандыла. Андан сора да  штабха заявкала берген жыл санлары 65 атлагъан инсанлагъа  продуктладан толу хуржунла ташыгъандыла.

«Президентни атындан Ыразылыкъ къагъытны алгъаныма чексиз къууаннганма, ёхтемленнгенме. Ол жаланда мени къыйыным тюйюлдю, бизни саулай коллективибизни бирлешип кюрешгенибизди. Ишибизге бийик багъа бичилгенине жюрек ыразылыгъымы билдиреме. Къууанчымы ачыкъларгъа сёзлерим  жетмейдиле.  Волонтёрларыбыз кёл салып кюрешедиле. Башха адамланы  къыйын кезиулерин кеслериникича кёрюп, кеслерин аямай, къолдан келгенча, бир азчыкъ окъуна къууандыр ючюн урунадыла. Мени алып айтханда уа, волонтёрлукъ  бла кюрешген уллу жашау сынам береди. Итиниулюгюм  жюрегимден келеди», - дегенди Залина Кушхова.

Бюгюнлюкде къызны штабы кесини ишин тынгылы  бардырады. Анда уруннган жаш тёлюню арасында уллу шуёхлукъ  жаратылгъанды. Социальный  сетьледе  ала бир бирлери бла ушакълашханлай  турадыла. Бир уллу юйюр кибик болгъандыла, аны себепли, этген ахшылыкълары кёрюнмей къалмагъандыла.