Жай иссиледе - кёлде

Майскийде шахар кёлге шёндюгю исси кюнледе бек кёп адам барады жууунургъа. Муниципалитетни администрациясында белгилегенлерине кёре, ол ортакъгъа берилгенди. Арендатор а аны тапландырыу жаны бла аслам иш тамамлагъанды. Аны хайыры бла кёлню тёгереги таза, кёзню къууандырырча алай болгъанды. Солургъа келгенлеге, таматалагъа, сабийлеге да анда хар неда барды дерчады.

Сабийлеге деп кёлню терен болмагъан жерин тёгерегине белгиле орнатып бёлгендиле. Сууну къатында алагъа ойнарча, заманларын зауукълу ётдюрюрча жерле жарашдырылгъандыла.

Суугъа киргенлени ичинде жюзе билмегенле да боладыла. Аны себепли кёлню тёгерегинде къутхарыучуланы посту къуралгъанды; анда юч специалист ишлейди.

Адамла солугъан тийреде кир-кипчик тёгерге жарамайды. Алайланы хар эрттен сайын тазалап турадыла.

Кёлде сууну тазалыгъына, качествосуна да Роспотребнадзорну адамлары къарайдыла. Тёгерекде-башда санитариягъа да кёз жетдиредиле.

Жай кезиуде, иссиликде сууда кечиниу кимге да игиди. Ол адамны саулугъун кючлендиреди, тюрлю-тюрлю аурууладан кери этеди. Кёлню тап халда тутханланы да барды анда къыйынлары.