Жашау журтланы санына танг къошулады

Быйыл жылны биринчи жарымында Къабарты-Малкъарда 146 минг квадрат метрден асламны тутхан  жашау журтла ишленнгендиле. Ол былтыр бу заман бла тенглешдиргенде 14,5 процентге кёпдю.

- Мындан арысында да къурулушну ёсдюрюрча министерство къолундан келгенича себеплик этерикди. Быйыл республикада биринчи июльгъа 146 324 квадрат метр жашау журт сюелтилиннгенди. Ол былтыр бла тенглешдиргенде 14,5 процентге кёпдю. Анга кёре къысха заманны ичинде бёлюмню ахшы жетишимлерини юсюнден айтыргъа боллукъду, дейди КъМР-ни къурулуш эм жашау журт–коммунал мюлк министрини орунбасары Локияланы Алан.

Ол айтханнга кёре, ала миллет проектлеге да тири къатышадыла. Субсидияланы хайыры бла жангы районлада жашау журтланы тийишли коммунал ызла къошарча мадар да тири хайырланады. Ол себепден жууукъ заманда аслам юйню инфраструктура бла жалчытыргъа онг табыллыкъды.

Быйыл республикада 528 минг квадрат метр жашау журт ишлер муратлыдыла. Ол а буруннгу жыл бла тенглешдиргенде 11,4 процентге кёпдю. "Жашау журт эм шахар тийре», «Ипотека», «Жашау журт», «Иги шахар болум къурау» эм «Жашаргъа жарамагъан юйлени санын азайтыу» дегенча миллет проектле 2024 жылгъа дери бардырыллыкъдыла. Ол къурулуш бёлюмню айнытыргъа аламат онг береди. Саулай алып айтханда, проктлеге бюджетден эм башха жерледен да бир триллион сом бёлюнюрюкдю.