Арбазларын тапландырыргъа сюйгенле - ашыгъыгъыз

   Нальчик шахарны жер-жерли администрациясындан билдиргенлерине кёре, быйылдан башлап 2024 жылгъа дери бардырыллыкъ «Шёндюгю шахар тийре» деген программаны юсю бла къыралны бюджетинден муниципалитетге аслам  ахча берилгенди. Аны хайырындан  кёбюрек арбазны эмда магъаналы жамауат жерлени тапландырыргъа онг  чыкъгъанды. Энди уа шахарчыладан  къайсы  тийрени  игилендирирге  сюйгенлерини юсюнден  заявкаланы алыу башланнганды. Аны формасы администрацияны интернет-сайтында басмаланыпды.
   Заявканы  25 февральгъа дери муниципалитетни жашау журтла-коммунал мюлк управлениясына элтип берирге керексиз. Халкъ аслам жюрюген, солугъан  жерлени тапландырыу жаны бла оюмларыгъызны уа къалай сюйсегиз да билдирирге боллукъсуз, ол санда телефон бла сёлешип, Интернет бла  неда письмо жазып.
Дагъыда энди заявкаланы сюзгенде, алгъыннгы излемледен сора, кёп фатарлы юйню жумушларын жалчытыу жаны бла къайсы амал (управляющий компания, ТСЖ неда фатарланы иелери кеслери) сайланнганына да къараллыкъды. Аны бла бирге коммунал тёлеуле заманында берилгенлерине бла къалгъанларына  да эс буруллукъду.  
   Андан сора  программагъа къайсы объектле тюшериклери белгиленирикди. Соруулары болгъанла управлениягъа  42-55-73 телефон номер бла сёлешсинле.