Аграрчылагъа болушлукъгъа – 1,2 миллиард сом

Быйыл Къабарты-Малкъарда агропромышленный бёлюмге къыралдан 1,2 миллиард сом бёлюннгенди. Ол бара тургъан жылда берилирге керек ахчаны эки тенгинден кёпдю, деп билдириледи КъМР-ни Эл мюлк министерствосуну пресс-службасындан. 

   - Субсидияны  асламы - 1,1 миллиард сом - федерал бюджетденди, 82 миллион сомну уа  республика къошханды. Ол регионну эл мюлк бёлюмюне болушлукъгъа берилирге керек ахчаны  52 процентиди. Эсге сала айтсакъ, ол Шимал-Кавказ федерал округда эм иги кёрюмдюледен бириди. Саулай къыралда да орта эсепге келишеди.

Болушлукъну битимчилик эм малчылыкъ бёлюмледе къармашханла аладыла. Ол санда инвестиция эм гитче мюлк бардырыргъа деп алыннган  ёнкючлени процентлерин жабаргъа,  инженер инфраструктураны айнытыргъа эм эл жерлени болумларын игилендирирге къоратыргъа жарайды. 

Быйыл ахчаны  «Ишин  энди башлагъан фермер», «Юйюр ферма», «Агростартап» проектлеге, мелиорацияны айнытыугъа эм башха жумушлагъа хайырланыргъа жарарыкъды.   

 - Къабарты-Малкъар  аграр республикады, аны ючюн битимчилик эм малчылыкъ бёлюмледе уруннганлагъа субсидия  ахшы себеплик этеди.  Аны бла бирге мындан арысында эл инфраструктураны игилендирирге да   аслам эс буруллукъду.  Саулай алып  айтханда, бара тургъан жылда республиканы  агропромышленный  комплексин  айнытыугъа эм азындан 2,2 миллиард сом бёлюнюрюкдю. Ол былтыр бла тенглешдиргенде 15 процентге кёпдю, деп билдиргенди КъМР-ни эл мюлк министри  Хасан Сижажев.