Кеси билген затлагъа сабийлени да юйретирге сюеди

Жашауну къайсы сферасында да, къалайда да кеслерини атларын иги бла айтдыра, окъууда, ишде да юлгюлю къызларыбыз-жашларыбыз да аз тюйюлдюле. Аланы жетишимлерине уа ёсдюргенлери, юйретгенлери бла бирге биз да къууанабыз.

Къабарты-Малкъар къырал университетни педагогика, психология эмда физкультура-спорт билим бериу институтуну ючюнчю курсуну студенткасы Моллаланы Анина да ышандыргъан жаш тёлюбюзню санындады. Алгъаракълада сагъынылгъан вузда жаш алимлени Илмуну кюнюне аталгъан кезиулю кёрмючлеринде адепли, ийменсе да, не айтырын, проектин къалай кёргюзтюрге керегин да билген къызчыкъ кёзюбюзге хычыуун кёрюннген эди. Анда уа ол, «Мен болушурукъма!» деген иши бла айырмалы болуп, диплом бла да саугъаланнганды.

Мени бюгюннгю жигитим Нальчикде ёсгенди, шахарны жетинчи номерли мектебин жетишимли тауусханды. Школда окъуй тургъан заманында окъуна ол ыннасы Галина Сергеевна Сафаровагъа, андан сора да, кесини биринчи устазы Кульчаланы Зарема Магомедовнагъа ушап, педагог болургъа сюйгенди. Аны себепли усталыкъ сайлап да кёп къыйналмагъанды.

Бюгюнлюкде сагъынылгъан институтну башланнган билим бериу факультетинде окъуйду. Айыргъан усталыгъыны юсюнден а «Мени сабийлеге берир, юйретир затым барды. Кёпле сейир да этедиле бу жолну сайлагъаныма. Алай а ала, мектепни тауусуп, бир жыйырма жылдан мени эслерине тюшюрлюклери, къаллайла боллукълары манга сейирди», - дейди.

Илмуну юсюнден айтсакъ, ол иги кесек уллу статьяны авторуду. Ала уа РИНЦ-ге (россейли алимлени илму ишлерини библиографиялы базасы) кирген журналланы бешисинде басмаланнганларын белгилерчады. Бу ишге жол ачханы, анга эс бурдургъаны ючюн а психологиядан преподаватели Нёгерланы Мариям Татуевнагъа, саулай институтха да ыразылыгъын билдиреди. Кесини «Свойства межличностных отношений младших школьников» деген статьясы бла Екатеринбург шахарда бардырылгъан «Илму. Жангычылыкъла. Чыгъармачылыкъ» Битеуроссей конкурсда хорлап, диплом, саугъа да алгъанды.

Ушакъ нёгерими мураты устазны жолу болгъанын эсге алсакъ, башланнган класслада окъутурча аны хар не хунери да биргесине барлыгъын да чертирчады. Нек дегенде ол «Занавес» (художестволу башчысы Мадина Докшукина) студент театргъа биринчи курсдан да жюрюйдю. Шахарда Искусстволаны биринчи номерли школуну хорунда жырлап тургъанды, аны фортепианодан классын тауусханды.

Дагъыда ол сурат ишлерге устады. Анга бир жерде да окъумагъанды, кеси аллына тюшюннгенди. Болсада аны къарандаш, компьютер бла да этген графикасына бир кесек къарап турлугъунг келеди. Аланы профессионал ишлемегенди деп да ийнаналмайса. Бу ышанла барысы да гитчелени окъутууда, юйретиуде, айхай да, керекдиле.

Ушагъыбызны кезиуюнде, андан сора да, студент къызчыкъны кёзлеринде сабийлеге уллу сюймекликни, жандауурлукъну да сезгенме. Ол университетде билим алып башлагъанлы бери да волонтёрлукъ бла кюрешеди. Былайда да белгилерге тийишлиди, ол аны социал ызын сайлап, ауругъан балачыкълагъа бла аланы ата-аналарына болушлукъну тапдырыу жаны бла кюрешеди. КъМКъУ-ну инклюзив волонтёрларыны башчысыны орунбасарыды.

Биз огъарыда сагъыннган «Мен болушурукъма!» деген проектни да бу затха атап, аны бла эки жыл чакълы кюрешеди. «Бизни болушлугъубуз эм алгъа чекленнген онглары болгъан сабийлени ёсдюрген ата-аналагъа керекди. Алагъа не аз да эс берир амалланы, мадарланы излегенлей турама», - дейди. Адам къайда ишлесе, жашаса да, къатындагъына билеклик эте билирге, къыйынлыкъгъа тюшгенни жангыз къоймазгъа юйренирге кереклисин айтады.

Жаш тёлюню асламысыча, ол да школну бошагъан кезиуюнде республикадан тышында билим алыргъа къызыннганын да жашырмайды. Болсада, къадар алай тюшюп, мында къалгъаны ючюн бюгюнлюкде ыразы болгъанын кёлю кётюрюлюп хапарлайды. Ол окъугъан юч жылны ичинде окъуна университет кюнден кюннге иги жанына тюрлене баргъанына, билим алама, айныйма деген студентге мында да иги кесек онг болгъанын чертеди.

Жаш адамла бузулупдула, ала тамблагъы кюнню юсюнден сагъыш этмейдиле, окъумайдыла, айнымайдыла деген оюмла хар заманда да бирча тюз болуп къалмагъанларын да белгилейди. Аны тенглерини арасында ким да юлгю алырчала болгъанларын айтады.

Окъууундан, жамауат ишинден бош заманында уа ол илму литератаруны окъуйду. Хар неге да алимлени кёз къарамлары, тенглешдириулери, оюмлары къалай болгъанлары анга сейирди. Дагъыда ол фантастика фильмлени жаратады. «Аланы нек сюйгеними уа кесим да ангыламайма, ким биледи, мыйым бираз солусунму депми», - деп кюледи кеси уа.

Айхай да, хар кимни да бу дуниягъа кёз къарамы аны ёсген юйюрюнден башланады. Атасы Тимур, жашаудан эртте кетген эсе да, сабийлерин тау адетге юйретгенине ыспас эте эсгереди. Анасы Аннагъа уа къарындашы бла анга бу жашауда окъууну-билимни, кесини ишинде профессионал даражагъа жетиуню магъанасына тюшюндюргени ючюн ыразыды. Биз а ариу къылыгъы бла да айырмалы къызчыкъ этген ахшы муратларына жетер, келир заманда аты айтылгъан устаз болур деп ийнанабыз.