Технологияла бла бирге оноу эте билиуню магъаналылыгъы бийикди

Къытайда жангы жолла бир сагъатха 750 метр терклик бла ишленедиле!
Бизге уа алай тири болургъа ким чырмайды, деп сорулады «Аргументы и факты» газетни материалында.

Жолла эмда кёпюрле ишлеуде къытайлыла салгъан рекордла сейирге къалдырадыла. Сёз ючюн, алгъаракъда жангы темир жол вокзалны къатында уллу жолну тогъуз сагъатны ичинде ишлеп бошагъандыла.

Бийик усталыкъ, жангы технологияла

Бу къыралны юг регионунда юч уллу темир жолну энтта да бирине жаланда бир кечени ичинде къошуп чыкъгъандыла. Къурулушха минг бла жарым адам къатышханды эмда анда 23 экскаватор хайырланылгъанды. Ала, жолну ишлеу бла чекленип къалмай, светофорланы эмда башха керек затланы да орнатхандыла.

Къытайда темир жолланы ишлеучю TiesijuCivilEngineering компанияны башчысыны орунбасары ЧжанДаосун айтханнга кёре, бу проектде бир кезиуге жети бригада къармашханы ючюн тамамларгъа онг чыкъгъанды аны былай къысха заманны ичинде. Алай бу жетишим жаланда уста оноу этиуню хайырындан болмагъаны уа баямды.

Сёз мында жангы технологияланы юсюнден барады. Юлгюге быллай шарт: буруннгу жыл къытайлыла жюзметрлик эки кёпюрню сагъат бла жарымны ичинде кётюрюп, кёнделен салгъандыла. Деменгили конструкцияланы темир жолну жанында жыйып, ызы бла уа, кётюрюп, хазыр чыпынлагъа орнатхандыла. Ол кезиуде уа кёпюрню тюбю бла машинала жюрюгенлей тургъандыла.

2015 жылда уа къытайлыла 43 сагъатны ичинде Пекинде эски кёпюрню чачып, аны орунуна алты машина жолу болгъан жангы кёпюр салгъандыла. Аны къой, анда белгиле окъуна орнатхандыла. Кёпюрню мурдору (1300 тонналыкъ конструкция) алайгъа хазырлай келтирилген эди.
Подрядчикни келечиси билдиргеннге кёре, анда жангы технология хайырланылгъанды. Тёрели амалла бла жангыртыу ишле эм азы бла эки айны аллыкъ эдиле. Алай ол жолну аллай бирге жабаргъа арталлыда жарамай эди.

Биз бир жылгъа этгенни бир ыйыкъгъа тамамлайдыла

Бюгюнлюкде Къытайда жангы жолла бир сагъатха 750 метр терклик бла ишленедиле. Битеу жангы трассала ахыр жыйырма жылны ичинде къуралгъандыла! Къалай болгъанды да Къытайда «жол тамашалыкъ», биз ол ахшы сынауну нек хайырланмайбыз?

«Къурулуш жаны бла бу къырал эрттеден бери жаланда бизни угъай, битеу дунияны окъуна озгъанды», - дейди инженерлени-сметчиклени Союзуну президенти Павел ГОРЯЧКИН. – Къурулуш материалла чыгъарыу жаны бла уа алагъа жетген жокъду; америкалыла окъуна узакъда къалгъандыла. Быллай юлгю: биз бир жылгъа 79-80 миллион тонна цемент чыгъарабыз, къытайлыла уа бир миллиард тоннадан артыкъ! Ол бек кёпдю,  бютюнда ала бу цементни тышына сатмагъанларын эсге алсакъ. Бизде бир жылны ичинде ишленнген жолланы ала бир ыйыкъгъа тартадыла. Биз Къытайда чыгъарылгъан  аберилени  хыликкя этип тургъанлыкъгъа, ала уа битеу жангы технологияланы жыйышдырып тургъандыла. Энди уа миллионла бла  къытайлыла кюрекле бла жер къазадыла дегенча къара ишле унутулгъандыла.

Бюгюнлюкде къытайлыла кеслеринде къурулуш техниканы бла оборудованияны битеу тюрлюлерин чыгъарадыла. Аланы инженерлери сау дунияда эм иги университетледе билим аладыла, стажировканы ётедиле. Къыраллары да алагъа дайым болушлукъ этгенлей турады. Экономиканы алгъа тартхан бёлюмледен бири къурулуш болгъанын ала бек иги ангылайдыла, аны себепли бу бёлюмге аслам инвестицияла этедиле. Къытайлыла иш кёллю, хунерли миллетдиле. Ала хайырланнган технологиялагъа къарагъанлай окъуна эслейсе къалай ёсюп баргъанларын.
Бизде уа къурулушха не къадар кёп ахча тёгюп тургъанлыкъгъа, алача ишлерге къолдан келмейди. Хау, биз да бир затла билебиз: жангы техникабыз барды, къурулуш материалланы рыногу айныпды, инженерлерибиз да хунерлиле, алай дагъыда…

Дагъыда бир зат: алада къырал къуллукъчула транспорт сетьлени планировкасын экономиканы ёсе эмда машиналаны саны кёбейе баргъанына кёре этедиле. Анга бек кёп ахча бёлюнеди. Бизни къыралларыбызда бир километр жолну багъасы кёп къалмай тенг болгъанлыкъгъа, Къытайда быллай къурулуш бир ненча кереге терк эмда качестволу да бардырылады, жангы жол а 25 жыл хайырланып турады.

Не зат къууандырады десегиз, бизни къурулушчуланы къытайлыла бла бирге проектлери болгъаны. Аланы эм уллу жол-къурулуш корпорациялары Россейге инвестицияла этерге сюедиле. Ма ол себепден аладан жангы затлагъа юйренирге, ахшы сынауну да алыргъа керекди - жаланда инженерлеге бла къурулушчулагъа угъай, оноучулагъа да.