Бирле – жылы кийимле, башхала - ашарыкъла

    Нальчикде  социал болушлукъ бериу жаны бла ара жангыз жашагъан къарт-къарыусузлагъа  бютюн  сакъды, алагъа дайым  кёз-къулакъ болуп турады.   Анда ишлегенлени себепликлери  эмда жандауурлукъ этгенлени  болушлукълары бла аллайлагъа шахарда жыл сайын  ашарыкъ затла юлешинедиле. Бу жол да алай болгъанды:  жетмиш адамгъа  жыйырмашар килограмм картоф, бешишер килограмм сохан, биришер литр чеплеу жау эмда  татлы суула берилгендиле.
   -Быллай   ишлени биз «Жандауурлукъ этерге ашыкъ» деген акцияны чеклеринде жылгъа бир ненча кере  бардырабыз, - дегенди социал араны директору Заур Бетуганов. - Шахарчыланы араларында жандауурлукъ этерге сюйгенле, насыпха, кёпдюле. Ма бу жол да, сагъыннганыбызлай окъуна, бирлери ахча,  жылы юс эм аякъ кийимле, башхалары уа аш-азыкъ затла келтиргендиле. Ала барысы да эсепге алынып, тийишли жумушлагъа къоратыладыла эмда юлешинедиле.
   Бизге УФСИН-де  къуллукъ этгенле, КъМКъУ-ну медицина колледжини студентлери,  Кёп функциялы жаш тёлю арадан волонтёрла да бек болушадыла, аны ючюн алагъа ыспас этерге сюеме.