Артистле сабийлени къууандыргъандыла

    23 январьда Прохладный шахардан гинжи театр эм Нальчик шахардан «Шаудан» жыр ансамбль КъМР- ни Саулукъ сакълау министерствосуну Сабий юйюнде жандауурлукъ акция бардыргъандыла.

Бу кюнледе Сабий юйню реабилитация бёлюмюне элли тёрт саусуз сабий келгендиле. Ала къыйын ауругъанлары ючюн барысы да аналары бла биргедиле. Реабилитация бёлюмню таматасы Инна Дзагалова айтханнга кёре, бёлюм  ачылгъанлы жети жыл болады. ДЦП диагнозлары болуп жюрюялмагъанла неда айныулары мардаладан артха къалып, сёлешмеген балачыкъла мында тынгылы болушлукъ табадыла. Жылгъа эки-юч кере багъыладыла. Жарсыугъа, саусузланы саны ёсюп барады, бир-бирде сакъатла кезиулерин ай чакълы бир заман сакълайдыла. «Насыпха, ишибизде къууаннган заманларыбыз аз тюйюлдю, атлаялмагъанла жюрюгенлерин, сёлешалмагъанлагъа тил ачылгъанын да кёребиз», - дейди Дзагалова.
   Бу реабилитация арада сабийле жетижыллыкъларына дери багъыладыла, андан сора уа «Радуга» арагъа тюшедиле. Быллайчыкъланы кеслерин къояргъа онг жокъду, аналары къатларында турадыла. Аны себепли профессионал жаны бла не ишлерге, не айныргъа онглары болмайды, бир-бирлерини жашаулары инвалид сабийлерини къатында озады. Бу адамланы жюклерини ауурлукъларын ангылап, къолларындан келгенича болушургъа кюрешгенле аз тюйюлдюле. Сёз ючюн, шёндю бёлюмде уллу бассейн ачылгъанды спонсор ахчагъа. Сабий юйню директору Марита Крымукованы айтханына кёре, бусагъатда спонсор болушлукъну тренажёрлагъа деп жыя турадыла. Учрежденияны сайтында уа хар сом не затха къоратылгъаны жазылады.
   Гинжи театр бла жыр ансамбль сабийлени, абаданланы да бек къууандыргъандыла. Аланы экисин да бери келирча ийнаннган христианла къурагъандыла. Концертден сора да, къонакъла хар балачыкъгъа энчи саугъа  берген эдиле. «Бу байрам жомакъгъа ушай  эди, сау болугъуз, бюгюн сиз этген игилик юйюрлеригизге минглеп къайтсын!»- дегенди учрежденияны таматасы тюбешиуню ахырында.