Жашау журтланы саны иги да кёбейгенди

Быйылны биринчи кварталында бизни республикада предприятияла бла организацияла 349 жангы фатар (37,3 минг квадрат метр) ишлегендиле. Былтырны бу кезиую бла тенглешдиргенде, ол кёп къалмай оналты процентге аслам болады, деп айтылады СевКавСтатны билдириуюнде.

Сагъынылгъан кёрюмдюню ичинде 43 процентни элледе ишленнген фатарла аладыла. Дагъыда, статистика шартлагъа кёре, адамла кеси хакъларына неда кредитле алып 260 юй сюегендиле. Ол да озгъан жылны тийишли кезиуюню кёрюмдюсюнден ючден бирине кёпдю. Хайырланыугъа берилген жашау журтланы санында 81,9 процентин иели юйле аладыла.

Белгилисича, Къабарты-Малкъарны властьлары жарашдыргъан, кеси да болжалы 2021-2025 жыллагъа белгиленнген къырал программаны юсю бла  жашау журтладан юч миллион чакълы квадрат метр ишленирикди. Бу умутланы толтурурча 102,2 миллиард сом къоратыллыкъды. Андан тогъуз миллиарды федерал бюджетден жиберилликди, 574,1 миллионун республика, 211, миллион сомун а  муниципалитетле берликдиле. Къалгъан ахча бюджетледен тышында фондладан бёлюнюрюкдю.  Ал тергеулеге кёре, бу программаны  хайыры бла 1192 юйюр жашар жерле къоллу боллукъдула эмда 596 минг квадрат метр журтлагъа тынгылы ремонт этилликди.