Саугъа жигитни 73 жылдан сора тапханды

Улу Хорламны 75-жыллыгына

Ата журтуну жалынчакъсызлыгъы ючюн жанын берген аскерчиле барысы  да асыралгъынчы къазауат бошалмайды, дегенди Александр Суворов. Хау, Уллу Ата журт урушда Хорламгъа быйыл 75 жыл толады. Алай бюгюн да битеу жигитлени атлары ачыкъ этилмегенди, хар кюн да жангы шартла тохташдырыладыла.

Сёзге, ол къанлы къазауатда батырлыкълары ючюн къырал саугъалагъа кёргюзтюлюп, алай  тюрлю-тюрлю сылтаула бла аланы алмай  къалгъанла ненчадыла?   

Юлгюге, батыр аскерчи Геляланы Рамазаннга   Махтаулукъну Орденини 3-чю даражасы къазауат бошалгъандан сора 73 жылдан  жууукъларына берилгенди. Геляланы Бисолтанны жашы Рамазанны юсюнден а кёп заманны ичинде жукъ да белгили болмагъанды. «Российская газетаны» «Хорламны Жулдузлары» деген излеу базасында ол Сыйлылыкъны Орденини 3-чю даражасы берилгенини, алай ол иесин тапмагъаныны юсюнден билдириу жаланда 2018 жылда басмаланнганды. Ол 1944 жылда 10 сентябрьде Богуслав шахар ючюн сермешледе батырча  жоюлгъанды.   Румынияда Карпаты тауну кюнчыгъыш жанындан 817 бийикликде асыралгъанды.

Геляланы Рамазан Къызыл Аскерге Огъары Малкъардан чакъырылгъан эди. Урушда ауур жаралы да болгъанды, 1-чи эм 2-чи Украина фронтда сермешгенди. 2-чи Украина фронтну 104-чю мараучу корпусуну командирини кёргюзтюую бла Махтаулукъну орденине тийишли кёрюлгенди. Аны саугъалау къагъытлада былай айтылады:  «Богуслав шахар ючюн эмда башха сермешледе Геляев батыр къызыл аскерчи  болгъанын кёргюзтгенди. Ол юч немислини ёлтюргенди. Молдова черекни тийресинде сермешледе душманны юч пулемётун жокъ этгенди».    

Алай аны юйюрю бу саугъаны эмда ол фашистле бла сермешде ёлтюрюлгенини юсюнден жукъ да билмегенди – юй бийчеси бла сабийлери малкъар халкъ бла бирге Орта Азиягъа зор бла кёчюрюлген эдиле.

73 жылдан сора Сыйлылыкъны Ордени эмда аны китапчыгъы Рамазанны туудугъу Османланы Фаризатха берилгенди. Жигитни аты уа ёмюрлюк этилгенди – ол КъМР-ни Эсгериуню китабына эмда Огъары Малкъарда Уллу Ата журт урушну жигитлерини эсгертмесинде жазылыпды.

Сёзсюз, мамырлыкъны сакълагъан батырланы атларын эсибизде тутхан кезиуде, ала унутуллукъ тюйюлдюле.  Уллу Ата журт уруш  дуния башында бек кюйсюз эм къанлы  къазауатча къаллыкъды. Совет халкъ ма быллай жигитлерибиз кеслерини жанларын аямагъанлары ючюн хорлагъанды анда.