Жангы автовокзалла ток сетьлеге къошулгъандыла

«Россети Шимал Кавказ» компанияны Къабарты-Малкъарда бёлюмюнден билдиргенлерича, Нальчикге кирген жерде ишленнген жангы «Северный» автовокзал кёп болмай ток сетьлеге къошулгъанды. Ары дери «Каббалкэнергону» специалистлери тийишли техника проектни жарашдыргъандыла. Вокзал ишленип башланнганда, аны къатларында энергоинфраструктура жокъ эди да, аны 110 кВ«СКЭП» подстанциягъа къошаргъа оноу этилген эди. Проект бла анга 2 МВт жиберирге керек болгъанды. Аны себепли ол подстанцияны да кючлюрек этерге тюшгенди. Аны бла транспорт объект ток бла ышаннгылы жалчытынырыкъды.

Билдиргенибизча, Нальчикни къатында  «Северный» эм «Южный» вокзалла жууукъ кезиуде ачыллыкъдыла. Аланы тийрелеринде сатыу-алыу павильонла да боллукъдула. Бу объектле шахарны ичинде транспорт болумну игилендирикдиле, туризм сфераны айнытыугъа да себеплик этерикдиле.