Элбрусда кёпюрлени жангыртадыла

КъМР-ни Транспорт эмда жол мюлк министерствосундан билдиргенлерича,  быйылны ахырына   Элбрусда энтта да эки кёпюр жангыртыллыкъды.

- Белгилисича, эки жыл мындан алгъа, уллу  ырхы келип, жол мюлк инфраструктурагъа иги кесек    халеклик салгъанды.   Андан бери районда   жангыртыу  ишле тохтаусуз барадыла.  Быйыл да,  программагъа кёре,  Тегенеклеге, Огъары Бахсаннга  эм Гара сууланы таласына элтген кёпюрлеге тынгылы ремонт этилликди, деп айтылады ведомствону пресс-службасыны билдириуюнде.       

Проектни чеклеринде  жолчула  кёпюрлени чигинжилерин кючлендирликдиле, асфальт жаярыкъдыла, жауун суу саркъырча системаны жарашдырлыкъдыла эм  жорукъланы  кёргюзтген белгиле бла  ызла  саллыкъдыла. Бюгюнлюкде подряд организация бла келишим этиле турады. Объектлени  саулай быйылны ахырына бошар умут барды.   

Эсге сала айтсакъ, алгъаракълада Росавтодорну автомашина жоллагъа къарагъан «Кавказ» управлениясы «Прохладный — Бахсан — Эл брус» А-158 федерал жолда   Исламейни  бла Нетринону эллени къатларында  кёпюрлеге да  тынгылы ремонт этип бошагъанды.