Осал къылыкъгъа къажау - бирден сюелирге

Бу кюнледе «Акрополь» маданият эмда солуу юйде наркоманиягъа къажау кюрешге аталып конференция болгъанды. Анда республиканы школларында, профессионал билим берген энчи эмда бийик окъуу юйлеринде бу ууну жайылмазыны амаллары сюзюлгендиле. Жыйылыуну «Россейни предприниматель тиширыуларыны ассоциациясы» битеуроссей жамауат организацияны регион бёлюмю, КъМР-ни жарыкъландырыу,  саулукъ сакълау, спорт, граждан обществону институтлары бла байламлыкъла жюрютюу эмда миллетлени ишлери жаны бла министерствола,  КъМР-да МВД-ни Наркотиклеге контроль этген управлениясы, Къабарты-Малкъар къырал университет, Кёп функциялы жаш тёлю ара бирге  бардыргъандыла.

Аны ишине республиканы битеу  эллеринден бла шахарларындан орта билим берген школланы социал педагоглары эмда устазлары къатышхандыла – битеу да жюзден артыкъ адам. Алагъа  конференцияны къурагъанла методика эсгертиуле бла «Профилактика ишде специалист хайырланыргъа боллукъ амалла» деген китапчыкъла хазырлап юлешгендиле.

Конференцияны не мурат бла  къурагъанларын ангылата, Россейни  предприниматель тиширыуларыны ассоциациясыны правленини тамиатасы Эфендиланы Рита жаш адамларыбызны араларында наркотиклени хайырланнганланы саны азаймагъаны аланы къайгъы этдиргенин, бу осал ишге къажау кюрешни хайырлы амалларын да излегенлерин чертгенди.

-Биз энчи социал проект жарашдырып, аны жашауда бардырып башлагъанбыз. Аны бла байламлы республиканы окъуу юйлеринде ишлеген устазла, социал педагогла, ата-анала бла да  тюбешиуле, «тёгерек столла» да бардыргъанбыз. Алада алимле, врачла, башха специалистле да сёлешип, наркортикле  саулукъгъа къаллай уллу хата салгъанларын ангылатыргъа кюрешгендиле,-дегенди ол.

Андан ары сёзюнде Эфендиланы Рита окъуучуланы араларында тестирование бардырылгъанда,  20 минг адамдан тёрт минги аны ётерге унамай къойгъанларын жарсып айтханды. «Бюгюн окъуу юйледе наркотиклени эмда психотроп затланы жайылмазларыны жангы, бютюн хайырлы амаллары туура этилирле деп ийнанама»,-дегенди.

Андан сора чыгъып сёлешген экспертле кеслерини сынауларындан юлгюле келтиргендиле. Сёз ючюн, Наркоконтрольну управлениясыны оперуполномоченныйи полицияны подполковниги Татьяна Николаева  школлада  профилактика  ишни къыйматлы амалларын туура этгенди. Нальчикде 6-чы номерли орта школну устазы-психологу Оксана Караева  наркоманланы санына тюшерге боллукъ сабийле бла психологла,педагогла да кеслерин къалай жюрютюрге керек болгъанларына юйретгенди.

КъМКъУ-ну педагогика институтуну директору Ольга Михаленко уа ол башчылыкъ этген окъуу юйде  алимле наркотиклени эмда психотроп затланы хайырланыргъа тюртген сылтауланы ачыкълау жаны бла эсгертиуле жарашдыргъанларын билдиргенди. Кёп функциялы жаш тёлю араны директору Саида Жанимова наркоманиягъа къажау кюрешге жаш адамла кеслери не юлюш къошханларыны юсюнден айтханды. «КБР-Медиа»  къырал казна учрежденияны бёлюмюню таматасы  Холаланы Тамерлан конференцияны къурагъанлагъа, ёсюп келген тёлюле ючюн къайгъырып, аланы адеп-къылыкъгъа юйретиу жаны бла ишге къыйын салгъанлагъа ыспас этгенди.

Устазла, социал педагогла да къурау комитетни къауумуна, докладчылагъа да кёп соруула бергендиле. Ахырында бу осал ишге къажау кюрешде кючню бирикдирирге, наркоманиядан сакъланыуну мадарларын къатыландырыргъа керекди, ол жетишимли жаланда ол заманда боллукъду, деген оюмгъа келгендиле. Жыйылыуда туура этилиннген амалла эсге алынып, жангы рекомендацияла жарашдырылгъандыла.