Уллайгъанлагъа къайгъырыуну эм башха салып

Нальчикде Пенсиячыланы  союзуну эмда Тиширыуланы  шахар советини  бу кюнледе бирге бардырылгъан жыйылыуларында озгъан жыл тамамланылгъан ишле сюзюлгендиле эмда 2020 жылгъа борчла белгиленнгендиле.

Советни таматасыны орунбасары   Раиса Униковская    отчёт кезиуде бу эки жамауат организацияны  башламчылыкълары эм тири къатышыулары бла битеу да   жыйырмадан артыкъ иш бардырылгъанын  билдиргенди, аладан  бир ненчасын  юлгюге келтиргенди. Сёз ючюн,  сабийлеге, тиширыугъа-анагъа, саулукъгъа, юйюрге жораланнган кюнле кенг халда белгиленнгендиле, тюрлю-тюрлю жыйылыула, тюбешиуле, жолоучулукъ да къуралгъандыла.  Аланы хар биринде да пенсиячылагъа,  къолайсыз эм жангыз къалгъан  уллайгъанлагъа предпринимательле  Роза Гетежева, Лариса Бабугоева, Лера Кумыкова, Лёля Дадали, дагъыда башхала саугъала этгендиле, сыйлагъандыла.

Жашаулары келгенлени компьютерде ишлерге юйретиу курсланы къурау да бу биригиуню башламчылыгъы болгъанды. Алагъа жылдан жылгъа кёпден кёп  адам келип юйренеди. Дагъыда учуз кийимлени тюкени да бу биригиуню къармашыуу бла ачылгъанды. Анга энди уллайгъанла угъай да, жаш адамла, юйюрле саулайда келгенлерин белгилерчады.

Раиса Николаевна  советни биринчи организацияларыны башчылары  Тамара Кимни, Тёппеланы Раяны,  Марина Карданованы, дагъыда башхаланы атларын ыспас этип  сагъыннганды. Кёп жумушла аланы тириликлерини хайырындан тындырылгъанларын чертгенди.  

Пенсиячыланы союзу уа асламысында  жарсыуларын билдиргенди. Анда республикада томография этдирир ючюн тёленирге тюшген хакъны асыры уллугъа санайдыла, жашаулары келгенлеге ол хакъсыз болурун излейдиле. Шахарны Александровка, Стрелка, Къабарты-Малкъар къырал университет тийрелеринде пенсиячыла бла ишлеу артыкъ аламат  къуралмагъаны да белгиленнгенди. Бир-бир жумушланы тамамлауну игилендириуню амаллары да кёргюзтюлгендиле.

Ахырында быйылгъа борчла белгиленнгендиле. Уллайгъанланы бир къауумуна уа саугъала юлешиннгендиле.