Энергетикле медиклеге, спортчулагъа, окъуучулагъа да болушадыла

РусГидро компанияны Къабарты-Малкъарда бёлюмюнде былтыр жандауурлукъ жаны бла этилген ишлерини эсеплерин чыгъаргъандыла. Андан билдиргенлерича, ол кезиуде онтёрт организациягъа болушлукъ бергендиле. Дагъыда сабийлеге эмда жаш тёлюге деп талай экология-жарыкъландырыу жумуш тындыргъандыла, тийишли акцияла да бардыргъандыла. Аны барына да юч миллиондан аслам сом къоратылгъанды.

«Энергиядан туугъанла» деген акцияны чеклеринде энергетикле Бахсанда район больницаны акушер бёлюмюне жангы оборудование алып бергендиле. Республикалы кардиология арагъа уа электрогенератор бла себеплик этгендиле.

Билим бериу учреждениялагъа да эс бурулмай къалмагъанды. Быллай учрежденияланы бир кесегине 900 минг сом багъасына билеклик этилгенди. Сёз ючюн, Герпегежде орта школну мекямыны башы жангыдан жабылгъанды, Заюковода 2-чи номерли орта школгъа компьютерле сатып алыннганды, Нальчикде эмда Атажукино элде биришер учреждениягъа биринчисине жангы мебель берилгенди, экинчисинде уа ашханагъа ремонт этилгенди.

Энергияны аяу жаны бла бардырылгъан #ВместеЯрче Битеуроссей фестивальны, «оБЕРЕГАй» эмда «Сууну кюню» деген акцияланы чеклеринде экологияны, энергияны юслеринден билим бериу эм жарыкъландырыу ишле бардырылгъандыла. Аланы кезиуюнде жюз бла жарым школчу бёлюмню ГЭС-леринде экскурсиялада болгъандыла.

Энергетиклени болушлугъу бла Къашхатауда Маданият юйге эмда Огъары Малкъарда больницагъа да ремонт этилгенди. Республикалы сабий фондха уа компания багъалы дарманла сатып алгъанды.

Спортну айнытыугъа да тийишли кёзден къаралгъанды. Бёлюмню башламчылыгъы бла эки турнир бардырылгъанды. Алагъа юч жюзден артыкъ жаш спортчу къатышханды. Футболдан СССР-ни чемпиону Александр Апшевге аталгъан Битеуроссей жаш тёлю турнирге Къабарты-Малкъардан, Дагъыстандан, Шимал Осетиядан, Ингушетиядан, Астрахань областьдан эмда Краснодар крайдан командала къатышхандыла. Дагъыда «Олимпийский совет» жамауат организация бла байламлыкъда сабийлени арасында шахматладан турнир бардырылгъанды.