Адам кесине не игиликни излей эсе да, башхагъа да алай къараргъа керекди

Сёзсюз, интернетни кёп игилиги барды. Алай анда кёпле кеслерини керти атларын да букъдуруп, миллетлени бир бирге юсгюрюр ючюн кёп кюч – къарыу саладыла. Анга ислам дин къалай къарайды? Бу сорууну биз Яникой элни иймамы Элеккуланы Хасаннга бергенбиз.

- Кертиди, шёндюгю жашау тынгысызды, алгъынча ишлеген заводла, фабрикала жокъдула, хар инсан башын кеси билгенича кечиндирирге кюрешеди. Эртте уллу коллективледе адамланы араларында байламлыкъла къаты эдиле. Шуёхлукъну дагъыда бир зат кючлендиргенди: халкъ тюзюнлей бир кибик жашамаса да, шёндюча айырыулукъ жокъ эди. 
Арт  заманда адамла бир бирлерине терс къарагъан кезиуле болгъанларына биз кюн сайын шагъатбыз. Ол а аз-аздан республикада тынчлыкъны бузаргъа, къаугъа къозгъаргъа боллугъун ангылагъан къыйын тюйюлдю. Ислам дин ол тюрлю ниетни, къылыкъны унамайды. Сыйлы Къуранны аятларында  эм Мухаммат файгъамбарыбызны (Аллахны саламы анга болсун) хадислеринде миллетчиликни не тюрлюсюне да къажаулукъ сезиледи. Бир жол хаж къылыргъа баргъанда, файгъамбар, кесини ызын тутханлагъа айланып, былай айтханды: «О, адамла! Бизни барыбызны да бир Аллахыбыз барды, барыбызны атабыз да Адамды. 

Жангыз бир араплыны да башха миллетни адамындан энчи айырмалылыгъы жокъду, башха миллетни жангыз бир адамы да араплыдан игиме дерге эркин тюйюлдю. Этини тюрсюнюне кёре да бир адам башхасындан иги тюйюлдю - ала жаланда Аллахха къалай табыннганларына кёре айырмалыдыла бир биринден».

Алай бла файгъамбарыбыз  миллетчиликни терслегенин кёргюзтгенди. Ол тюрлю тапсыз эм керексиз къылыкъны былай айтып сёкгенди: «Миллетчи адамны къатына бармагъыз, ол аман ийис этеди».

Кертиси бла да, адамны гынттылы болууу, кесин башхаладан ёрге тутаргъа кюрешгени игиликге элтмейди. Аны юсюнден да файгъамбарыбыз былай айтханды: «Кесин башхаладан не аз да ёрге кётюрюрге кюрешген адам жаннетге кирлик тюйюлдю». Мындан алда Кёнделен тийресинде болгъан къаугъа республикада жашагъанланы тынгысыз этгенлей тургъанды.Уллу къаугъа чыгъаргъа аздан къалгъанды. Бир адамны жанына къоркъуу тюшюп неда эки миллетни арасында мамырлыкъгъа шупха тюшюп этилген не тюрлю иш да бизге керек тюйюлдю. Быллай кезиуледе муслийманла огъурлу ниет жанлы болгъандыла, бир бирге дау айтханланы  жарашдырыргъа кюрешгендиле. 

Керти муслийман, башха миллетденди деп, адамны не намысын тюшюрлюк тюйюлдю, не анга аман кёзден къарарыкъ тюйюлдю. Башха миллетни адамына онг кёзден къарау, анга иги болуу аны тёзюмлюлюгюню ышаныды.

Советлени заманында интернационал шуёхлукъну клублары бар эдиле. Алада ёсюп келген тёлюлени ариу ниетге, къарындаш миллетлени сюерге, багъаларгъа юйретгендиле. Къоншу элле бир бирлерине къонакъгъа баргъандыла, бир бирлерин багъалагъандыла, сыйлагъандыла.Ол иги тёрени жангыртып, малкъар, къабарты эллени араларында шуёхлукъну кючлерге керек болуп турады. Республикада башха миллетлени келечилери бла да алай этилсе, бютюнда иги боллукъду.

Муслийманла адамланы, миллетлени араларында келишиулюк, жарашыулукъ болуруна къуллукъ этерге, ол ишлени аманатын боюнларына алыргъа борчлудула. Файгъамбарыбыз Мухаммат дагъыда былай айтханды: «Аллах бла ант этеме, адам кеси кесине не игиликни сюе эсе да, къоншусуна алай болурун сюймесе, аны ийнаныуу къарыусузду». Андан сора да, ол тохтамай былай айтыучу эди: «Мен сизге осуят этеме къоншуларыгъызгъа иги болуругъузну».

Мени акъылыма кёре, къырал, жамауат, дин къуллукъчула, кеслерини кючлерин бирикдирип, игиликни жакъларгъа, кемчиликлени жолларын кесерге борчлудула.

Аллах бизни палахладан сакъласын, къыяма кюн жаннетге элтген жолгъа тизсин. Мамырлыкъ, тынчлыкъ болсун, хурметли къарындашларыбыз, эгечлерибиз, хар юйюрюбюзге, элибизге, республикабызгъа, къыралыбызгъа да.