Эсгергендиле, дууа тутхандыла

Огъары Малкъарны эрттегили Сауту элинде   77 жыл мындан алгъа болгъан бушуулу  ишлени эсгергендиле. Белгилисича, ол зарауатлыкъ  1942 жылда 28  ноябрьден башлап 1 декабрьге дери баргъанды.  Ол заманда НКВД-ны  отрядлары  элде жашагъан къартланы, тиширыуланы эм сабийлени да аямай къыргъандыла. Бандитлеге къажау кюреш бардырабыз деген сылтау бла   жукълап тургъан  эллилеге чабып, хар юйге хылыф кирип, мамыр адамланы жойгъандыла, эллерин а кюйдюргендиле.

Замансыз бушуу сынагъанланы эсгерирге  КъМР-ни Муслийманларыны дин управлениясыны председателини орунбасары Мисирланы Хызыр, Черек районну жер-жерли администрациясыны башчысы Муртазланы Борис,  Огъары Малкъар элни администрациясыны башчысы  Табакъсойланы Камал, власть органланы, жамауат организацияланы келечилери,  Саутуда къырылгъан адамланы жууукълары да келгендиле.

Сёлешиуледен эмда эсгериуледен сора дин келечиле дууа тутдургъандыла, деп билдиргендиле Черек районну администрациясыны пресс-службасындан.