Школчуланы фахмулулары къайда кёпдюле

    Олимпиада.ру деген сайт арт беш жылны ичинде школчуланы араларында бардырылгъан Битеуроссей олимпиадаланы ахыр кезиулерини эсеплерине кёре, жетишимли регионланы тизмесин басмалагъанды. Рейтингни жарашдыргъанда, субъектде жашагъан 100 минг адамны санына кёре ненча диплом болгъаны эсге алыннганды.  Школчуланы фахмулулары къайда жашагъанларын тизме бла шагъырейленнген адам толу ангыларыкъды. Быллай эсепле былтыр да басмаланнгандыла. Анга кёре, быйылгъа 31 регион болумларын игилендиргендиле. Дагъыда аллай бирини жетишимлери осалгъа кетгендиле. 20 субъект а алгъыннгы жерлерин сакълаялгъандыла.
     

Алайды да, 82 регионну араларында биринчи юч жерде Москва шахар, Мордовия эм Удмурт  республикала орналадыла. Татарстан да аладан артыкъ артда къалмагъанды. Шимал - Кавказ республикаланы алып къарагъанда, Къабарты-Малкъардан къалгъанланы халлары бек осалды. Болсада бизни республика да тизмеде 54-дю. Алай къоншуларыбыз а 74 тизмеден башлайдыла. Бек тюбюнде  Шимал Осетия- Алания орналады. Жарсыугъа, Къарачай-Черкес Республика уа къауумгъа кирген да этмей къалгъанды.