Бизнесни айнытыуну юсюнден баргъанды сёз

Кёп болмай  Къабарты-Малкъар къырал университетде   Предпринимательствону ыйыгъыны  чеклеринде   «Гитче  бизнесни айнытыу» деген конференция бардырылгъанды. Аны КъМР-ни Экономиканы айнытыу министерствосу бла КъМКъУ къурагъандыла. 

Конференцияны ишине КъМР-ни Экономиканы айнытыу министерствосуну предпрнимательствону  информация-аналитика  жалчытыу эм экономикагъа кадрла  хазырлау жаны бла  бёлюмюню таматасы Фатимат Абазова, Педпринимательствогъа себеплик этиу фондну  таматасы Сергей Шестирублёв, Федерал налогла службаны Нальчикде 1-чи номерли инспекциясыны   таматасыны орунбасары Юляна Шаожева,  «HeadHunter» бренд- араны   проектле  жаны бла  тамата менеджери Диана Сухова, «Жангы стратегия» консалтинг компанияны  таматасы Елена Подберёзная, бизнес-тренер, бизнес -консультант Тимур Азаров, гитче бизнесни келечилери эм студентле къатышхандыла. 

Жыйылыуну ача, Фатимат Абазова КъМР-ни Экономиканы айнытыу министерствосу   гитче эм орта предпринимательствогъа  болушурча тюрлю-тюрлю мадарла этгенин    эсгерте,   ала «Экономиканы айнытыу эм инновациялы экономика» къырал программаны чеклеринде «КъМР-де гитче эм орта бизнесни айнытыу» подпрограмманы  жашауда бардырыуда   къыралны толтууручу власть органлары тири  байламлыкъда ишлегенлерин чертгенди.  «Жыл сайын къырал бюджетден анга бёлюннген ахчаны республикада гитче бизнесни айнытыргъа жиберебиз. Ол санда  арт жыллада ведомствону башламчылыгъы бла  предпринимательлеге   ахча, мюлк, информация-консультация эм билим бериу жаны бла   тутхучлулукъ этген организацияла  къуралгъандыла», - деп билдиргенди ол. 

 Тюбешиуде «Гитче эм орта предпринимательство» миллет проектни чеклеринде  КъМР-ни Экономиканы айнытыу министерствосу  беш республикалы проект бардыргъаны да айтылгъанды.   

Анга кёре,  предпринимательствону айнытырча,  бир тюрлю иш бла кюреширге сюйгенлеге ахча болушлукъ этерча, къыйматлы онгла къурарча, бизнес бла аслам адам кюреширча,  ол санда онтёрт жыллары толгъан жаш адамла да  анга тартылырча  этиледи.   Аны бла байламлы  ведомствону  структуралары жаш предпринимательлеге  бла школчулагъа   белгили бизнесменле бла видеоконференцияла ётдюредиле, тюрлю-тюрлю мастер-классла, тренингле да бардырадыла.   

Иги бизнес  башламчылыгъы болгъан министерствону  организацияларына  бла  структураларына  келсе, анга   информация, консультация болушлукъ бериллигин,  специалистле  бизнес-план  хазырларгъа болушурукъларын эм продукциясын кёрмючлеге бла ярмаркалагъа чыгъарыргъа себеплик этериклерин  да  билдиргендиле.  

Гитче эм орта бизнесге къыралдан къаллай болушлукъ этилгенини юсюнден а Сергей Шестирублёв хапарлагъанды. Ол айтханнга кёре,  КъМР-де  Предпринимательлеге себеплик этиу араны баш борчларындан бири бизнесде къармашханланы санын кёбейтиргеди  эмда алагъа тутхучлулукъ этергеди.    Арада консультация бериу, юйретиу бла да  кюрешедиле эм кёрмючле бла ярмаркала къураргъа болушадыла.   

Жыйылыугъа къатышханла  Гарантия,  Микрокредитле берген  коммерциялы болмагъан фондланы ишлерини эм  налогланы юслеринден да билгендиле. Белгили бизнес-экспертле  бардыргъан  мастер-класслагъа да къарагъандыла.