Сёз Жангы жылны байрам кюнлеринде жамауатны къоркъуусузлугъун эмда право низамны жалчытыуну юсюнден баргъанды

    КъМР-ни Правительствосуну юйюнде Казбек Коковну башчылыгъында Терроризмге къажау комиссияны бла республиканы Оператив штабыны  бирге бардырылгъан жыйылыулары болгъанды.  Анда  сёз Жангы жылны байрам кюнлеринде жамауатны къоркъуусузлугъун эмда право низамны жалчытыуну юсюнден баргъанды.
   -Социал магъаналы объектлени, адамла кёп санда жыйыллыкъ жерлени къоркъуусузлукълары ючюн жууаплы болгъан кючле къалай хазырланнганларына энтта да тынгылы къараргъа, ведомстволаны араларында бу ишде байламлыкълары къалай къуралгъанларына эс бурургъа керекди. Къоркъуу неден чыкъгъанын, къарыусуз жерлерибизни алгъадан билмесек, тюз мадарла не хазна табалырбыз,-деп чертгенди КъМР-ни Башчысыны къуллугъун толтургъан.
    Право бузукълукъланы болдурмау жаны бла программаны толтурууну эсеплерине, КъМР-де Терроризмге къажау комиссияны тауусула тургъан жылда ишине жыйылыуда энчи халда къаралгъанды, келир заманда бирге бардырыллыкъ баш мадарла белгиленнгендиле.
     Кенгешге КъМР-де баш федерал инспектор Евгений Ткачев, КъМР-ни парламентини Председатели Татьяна Егорова, КъМР-ни Правительствосуну Председатели Мусукланы Алий, министерстволаны, ведомстволаны, кюч структураланы, право низамны сакълаучу органланы, республиканы шахарларыны бла эллерини администрацияларыны башчылары къатышхандыла. Докладла бла КъМР-де ич ишлени министри Игорь Ромашкин, КъМР-ни культура министри Мухадин Кумахов, КъМР-де Терроризмге къажау комиссияны аппаратыны башчысы Анзор Уначев сёлешгендиле.