Хайырланыуда болгъан пластикни жангыдан жарашдырыу

Пластик къалгъан-къулгъанланы, шешаланы бир затха жаратырча къайтарып жарашдырыу бек  хайырлы ишди. Нек дегенде быллай затладан табийгъатха аслам заран тюшеди: ала чирип кетмей свалкалада жюз жылла бла турургъа боллукъдула. Багъасы учуз болгъаны ючюн а пластикден бек кёп зат этиледи. Ала да ызы бла кир-кипчик тёбеледе аслам жер аладыла.
Саулай айтханда, бизни къыралда жыл сайын бу материалдан этилген затладан керексизине талай жюз минг тонна тёгюледи,  асламысы шешала. Болумну игиге тюрлендирирча пластик къалгъан-къулгъанланы жарашдырыучу заводла ачылыргъа керекдиле. Бюгюнлюкде Россейде аллай онекиси ишлейди.
Бизни республикада да бу ишге тийишли эс буруп башлагъандыла. Быйыл жайны ал кюнлеринде «Экологистика» компания Нальчикде Хуранов атлы орамда пластикден этилген керексиз затланы жыярча энчи орун орнатханды. Бу башламчылыкъны гражданла дурус кёргендиле, тийишлисича хайырланып башлагъандыла. Аны себепли шахарда энтта да 25 орун орнатыргъа оноу этилгенди, деп билдиргендиле компаниядан. Алада жыйылгъан пластик къалгъан-къулгъанланы уа къоншу регионда жарашдырыучу заводха ташырыкъдыла.